Pas një periudhe të gjatë pa vizita në nivel të lartë, në Beograd arriti ministri i Jashtëm i Mbretërisë së Bashkuar, David Lammy.
Ky i fundit ka mbajtur të mërkurën takim me presidentin e Serbisë, Aleksandar Vuçiq, ku përveç nënshkrimit të një memorandumi bashkëpunimi, u shënua edhe nga një moment kur udhëheqësi serb u përpoq t’i shpjegonte mysafirit nga Britania e Madhe se pushteti që ai përfaqëson është shumë më demokratik sesa ai i Mbretërisë së Bashkuar dhe shumicës së vendeve të Bashkimit Evropian, shkruan nova.rs.
Mysairi, ashtu siç ndodh zakonisht në raste të tilla, nuk kishte zgjidhje tjetër veçse ta dëgjonte me mirësjellje mikpritësin, ndërsa opinioni publik vendas mbeti i habitur dhe i hutuar nga pyetjet – a beson vërtet presidenti në ato që thotë, apo me vetëdije përpiqet të mashtrojë një zyrtar të lartë të njërës prej shteteve më të fuqishme në botë.
Nëse e pyesni Vuçiqin – Serbia është bastioni i demokracisë në Evropë. Kjo, pavarësisht faktit se njerëzit arrestohen dhe dënohen me masa drakoniane për pjesëmarrje në protesta apo për hedhjen e një veze, dhe pavarësisht faktit që policia nuk reagon kur qytetarët kërkojnë ndihmë, ndërkohë që sulmohen para syve të saj nga persona të afërt me pushtetin.
Potenciali i saj demokratik u bë veçanërisht i dukshëm para ndërtesës së Presidencës, ku deri vonë, burra me maska dhe çekiçë në duar qëndronin nën mbrojtjen e xhandarmërisë, në një kamp të improvizuar të njohur më gjerësisht si “Çacilend”.
E gjithë kjo, së bashku me ndjekjen e vazhdueshme të mediave, opozitës, komunitetit akademik dhe çdo kundërshtari politik, i dha të drejtë udhëheqësit serb që t’i “mbante një leksion” mbi demokracinë dhe trajtimin e pjesëmarrësve në protesta mysafirit të lartë nga Londra.
Gjatë takimit, pasi ministri i Jashtëm britanik përmendi protestat, duke theksuar se vendi i tij nuk ndërhyn në çështjet e brendshme të Serbisë, presidenti u përpoq të shpjegonte se “asnjë lloj force” nuk ishte përdorur kundër demonstruesve (sigurisht, nëse nuk llogarisim faktin se anëtarët e SNS-it i thyen nofullën një studenteje në Novi Sad dhe se së fundmi dekania e Universitetit të Nishit u godit me thikë, pasi për ditë të tëra ishte demonizuar në media nga vetë presidenti).
“Sa i përket protestave tona dhe situatës politike në Serbi, jam shumë i lumtur dhe me krenari mund të them se, ndryshe nga shumica e vendeve të Bashkimit Evropian dhe bota në përgjithësi, në Serbi nuk është përdorur kurrë asnjë lloj force kundër demonstruesve, të cilët çdo ditë shkelin ligjin. Kemi dëgjuar shumë trillime për përdorimin e armëve akustike apo sonike, por ato kurrë nuk janë përdorur. Jemi të sigurt që shërbimi juaj sekret dhe të gjitha strukturat e tjera kanë të dhëna të sakta për këtë”, pohoi Vuçiq..
“Jemi të bindur se Mbretëria e Bashkuar dhe vendet e tjera në të ardhmen do të mund ta ndjekin me krenari shembullin e Serbisë – që pa përdorimin e dhunës të trajtojnë ata që protestojnë kundër qeverive të tyre, apo, le të themi, ata që hyjnë me forcë në BBC, dhe që të sillen ndaj demonstruesve që futen në transmetuesin publik ashtu siç sillemi ne”, theksoi ai.
Ndryshe, gjatë takimit mes Lammyt dhe Vuçiqit, u nënshkrua një memorandum mirëkuptimi midis Qeverisë së Serbisë dhe Sekretarit të Shtetit të Madhërisë së Tij për Biznesin dhe Tregtinë, duke vepruar përmes departamentit të garancive të kredive të eksportit, i cili funksionon si agjencia britanike e kredisë së eksportit, një memorandum mirëkuptimi ndërmjet Ministrisë së Punëve të Brendshme në luftën kundër krimit të organizuar të Serbisë dhe Mbretërisë së Bashkuar qëndron në mes të Ministrisë së Informacionit dhe Telekomunikacionit të Serbisë dhe Zyrës së Punëve të Jashtme, Çështjeve të Komonuelthit dhe Zhvillimit të Mbretërisë së Bashkuar.
