Kancelari gjerman, Olaf Scholz, i ka cilësuar tarifat e vendosura nga presidenti amerikan, Donald Trump, si “thelbësisht të gabuara”, duke kritikuar ashpër këtë veprim të administratës amerikane.
Në një deklaratë për media, Scholz e përshkroi vendimin e Trumpit si “një sulm ndaj një sistemi tregtar që ka krijuar mirëqenie në mbarë botën, një arritje vetë amerikane”, duke theksuar se ky sistem ka ndihmuar jo vetëm Evropën, por edhe Shtetet e Bashkuara dhe ekonominë globale në tërësi, shkruan Sky News
Sipas kancelarit gjerman, vendosja e tarifave prej 20 për qind ndaj Bashkimit Evropian do të ketë pasoja negative jo vetëm për kompanitë evropiane, por edhe për vetë konsumatorët dhe bizneset amerikane. “Një tregti e lirë dhe e drejtë është në interesin e të gjithëve. Masat proteksioniste dëmtojnë besimin dhe stabilitetin ekonomik”, tha lideri gjerman
Ai theksoi se Bashkimi Evropian, me 450 milionë konsumatorë, mbetet një nga tregjet më të mëdha dhe më të fuqishme në botë. “Ne jemi të përgatitur të mbrojmë interesat tona,” shtoi ai, duke lënë të kuptohet se Brukseli nuk do të qëndrojë duarkryq përballë kësaj sfide.
“Ne duam bashkëpunim, jo konfrontim”, tha Scholz, duke bërë thirrje për dialog dhe gjetjen e një zgjidhjeje përmes negociatave. “Por nëse detyrohemi, Evropa do të përgjigjet e bashkuar, e fortë dhe në mënyrë proporcionale ndaj këtij vendimi”, pohoi udhëheqësi gjerman.
Ndërkohë, presidenti francez, Emmanuel Macron, gjithashtu reagoi ndaj situatës, duke theksuar se Evropa duhet të veprojë me vendosmëri. “Nëse evropianët punojnë së bashku në përgjigjen ndaj Uashingtonit, ata do të arrijnë të shpërbëjnë tarifat e SHBA-së,” deklaroi ai, duke sinjalizuar një qasje të përbashkët evropiane për të kundërshtuar masat tarifore të Trumpit.
Liderët evropianë pritet të diskutojnë hapat e mëtejshëm në një samit të ardhshëm, ndërsa tensionet tregtare midis Brukselit dhe Uashingtonit vazhdojnë të rriten.
