Skuadra shqiptare KF Shkupi ka marrë një goditje të madhe pas tragjedisë së Koçanit, ku një diskotek u përfshi nga zjarri.
Mbi 59 viktima janë shënuar deri më tani, derisa në mesin e tyre është edhe futbollisti i Shkupit, Andrej Lazarov.
Një orë më parë Shkupi njoftoi se lojtari i tyre është jashtë rrezikut për jetë, por lojtari nuk i ka mbijetuar plagëve dhe ka ndërruar jetë.
Njoftimi i plotë nga FC Shkupi:
“Edhe pse paraprakisht nga familjarët e tij kishim informacione se është mirë, me dhimbje të thellë dhe pikëllim të madh, njoftojmë se futbollisti ynë, Andrej Lazarov, është konfirmuar mes viktimave të zjarrit tragjik që ndodhi gjatë natës në Koçan.
Si një shpirt hero që ishte, Lazarov humbi jetën duke u përpjekur të ndihmojë të tjerët të shpëtojnë nga ambienti i kapluar nga zjarri. Ai u helmua nga tymi gjatë përpjekjeve të tij për të shpëtuar jetë, duke treguar guxim dhe humanizëm deri në momentin e fundit.
Veprimi i tij heroik do të mbetet gjithmonë në kujtesën tonë, si një dëshmi e karakterit të tij fisnik dhe zemrës së tij të madhe.
Kjo është një humbje e madhe për klubin tonë, për shokët e ekipit dhe për gjithë komunitetin e futbollit. Fjalët janë të pakta për të përshkruar dhimbjen që ndjejmë në këto momente, në këtë tragjedi prej më të mëdhave në histori që e ka kapluar klubin tonë!
FC Shkupi i shpreh ngushëllimet më të sinqerta familjes së tij, të afërmve dhe gjithë familjes së madhe të klubit tonë.
Adrej ishte vetëm gjashtë muaj pjesë e Shkupit, por emri i tij do të mbetet i pashlyer gjithmonë si pjesë e skuadrës sonë.
Kujtimi për te do të mbetet gjithmonë i paharruar në zemrat tona!”, thuhet në njoftimin e klubit shkupjan.
