Cristiano Ronaldo, legjenda portugeze e futbollit, mund të rikthehet në futbollin spanjoll, por këtë herë në një rol krejtësisht të ri – si pronar i Valencias.
Sipas raportimeve të mediave spanjolle, të konfirmuara edhe nga Foot Mercato, Ronaldo ka filluar biseda me Peter Lim, pronari aktual i Valencias, për blerjen e shumicës së aksioneve të klubit.
Ronaldo, i cili aktualisht luan për Al Nassr në Arabinë Saudite, ka një marrëdhënie të gjatë biznesi dhe miqësie me Lim. Në fakt, Lim zotëron të drejtat e imazhit të Ronaldos, gjë që e bën këtë bashkëpunim edhe më të mundshëm.
Ylli portugez planifikon të kthehet për të jetuar në Spanjë pas përfundimit të karrierës së tij si lojtar, dhe blerja e Valencias do të ishte një hap strategjik për të.
Një faktor kyç që mund të lehtësojë këtë transaksion është mbështetja financiare e familjes mbretërore saudite. Fondet e investimeve të lidhura me ta mund të mbulojnë një pjesë të konsiderueshme të kostos së blerjes.
Kjo do të ishte një kthesë e madhe në karrierën e Ronaldos, duke e shndërruar atë nga një ikonë e fushës në një pronar klubi.
Valencia është një klub me një histori të pasur, duke përfshirë 6 tituj kampionati, 8 kupa dhe 2 finale të Ligës së Kampionëve (2000 dhe 2001).
Megjithatë, nën menaxhimin e Lim, klubi ka pësuar kritika të ashpra nga tifozët për shkak të rezultateve të dobëta, ndryshimeve të shpeshta të trajnerëve dhe politikave të dyshimta të transferimeve.
Nëse Ronaldo arrin të bëhet pronar, ai mund të sjellë një frymë të re në klub dhe të rivitalizojë shpresat e tifozëve. Kjo do të ishte një kapitull i ri jo vetëm për Valencias, por edhe për vetë Ronaldo, duke e vendosur atë në një rol të ri dhe sfidues në botën e futbollit.
