Rinumërimi i votave të 28 dhjetorit për komunën e Podujevës është duke vazhduar në Qendrën për Numërim dhe Rezultateve. Sipas të dhënave të Komisionit Qendror të Zgjedhjeve deri në orën 23:00 janë rinumëruar 55% e vendvotimeve apo 61 nga 110.
Manipulimi me vota brenda listave të kandidatëve për deputetë, sipas platformës së KQZ-së është i theksuar edhe në këtë komunë, veçanërisht brenda listës së Lëvizjes Vetëvendosje.
Deri në këtë pikë të rinumërimit, ministri në detyrë i Mbrojtjes, Ejup Maqedonci ka “përfituar” më së shumti nga skema e manipulimit.
Të dhënat e KQZ-së tregojnë se gjatë procesit të numërimit në Qendrën Komunale të Numërimit në Podujevë atij i janë shtuar 413 vota.
394 vota i janë shtuar edhe Vendenis Lahut të Vetëvendosjes e 241 vota, Adelina Stubllës.
Në radhët e Partisë Demokratike të Kosovës, 173 vota përmes manipulimit i janë shtuar Ditjona Statovcit.
Procesi i rinumërimit, sipas KQZ-së pritet të përmbyllet brenda këtij muaji.
