Kryeministri i cilësoi kritikat për kostot dhe efektivitetin e qendrave si pjesë të klimës së zakonshme të akuzave politike dhe të informacionit të fragmentuar.
Samiti i parë ndërqeveritar Itali-Shqipëri në Romë riafirmoi marrëdhënien gjithnjë e më të ngushtë midis dy qeverive dhe harmoninë politike mes kryeministres italiane Giorgia Meloni dhe homologut shqiptar Edi Rama.
Në një intervistë të dhënë për gazetën Corriere della Sera, Rama nënvizoi se bashkëpunimi dypalësh është sot “historik” dhe se projektet e përbashkëta po shtrihen nga energjia te mbrojtja dhe siguria kufitare.
Por çështja që vazhdon të gjenerojë debat në të dy vendet mbeten qendrat italiane për emigrantët në veri të Shqipërisë.
Megjithëse projekti ka hasur pengesa politike dhe ligjore, kryeministri shqiptar shmangu polemikat, duke thënë se gjithçka tashmë varet nga kuadri i ri evropian.
“Pakti i ri Evropian për Migracionin do të na tregojë se si do të evoluojnë këto qendra”, deklaroi Rama, duke theksuar se modeli aktual mund të përshtatet sapo të qartësohet arkitektura e re e politikave të BE-së në këtë fushë.
Sipas tij, vendet e përfshira në këtë proces janë të shumta dhe ndryshimi institucional në Bruksel do të ndikojë drejtpërdrejt në funksionimin e marrëveshjes Romë-Tiranë.
Rama i cilësoi kritikat për kostot dhe efektivitetin e qendrave si pjesë të klimës së zakonshme të akuzave politike dhe të informacionit të fragmentuar.
“Shqipëria nuk ka investuar asnjë euro në këtë projekt”, theksoi ai, duke i cilësuar akuzat për shpërdorim të fondeve si të pabazuara.
Në planin strategjik, kryeministri vuri në dukje se bashkëpunimi me Italinë shtrihet përtej dosjes së migracionit.
Ai përmendi mbështetjen e fortë italiane për hapjen e kapitujve të fundit të negociatave të anëtarësimit, synim që Tirana dëshiron ta finalizojë deri në vitin 2027.
“Italia është avokatja jonë tradicionale në BE”, tha ai, duke e cilësuar rolin e Romës në Bruksel si “vendimtar”.
Rama u ndal edhe te sfidat gjeopolitike, duke paralajmëruar sërish se Evropa duhet të gjejë një ritëm të ri në një botë ku boshtet e reja strategjike po transformojnë ekuilibrat globalë.
Për Ukrainën, ai u shpreh se Shqipëria “mbështet plotësisht integritetin territorial”, por se BE-ja duhet të prodhojë më në fund një plan të qartë paqeje.
