Rama: Faktorët politikë ta çmojnë ftesën e Trumpit për Kosovën për të qenë pjesë e Bordit të Paqes

Kryeministri i Shqipërisë Edi Rama, e ka uruar presidenten e Kosovës Vjosa Osmani, për marrjen e ftesës nga Donald Trump, për t’u bërë pjesë e Bordit të Paqes.

Rama e quajti këtë si një hap që forcon edhe më tutje marrëdhëniet e Amerikës dhe popullit shqiptar.

Ai theksoi se njëherësh ky është edhe një sinjal domethënës për sigurinë e përkatësinë e Kosovës në hapësirën e interesit të gjerë amerikan.

“Urime zonja Presidente, e dashur Vjosa, për marrjen e ftesës për t’u bërë pjesë e Bordit të Paqes, një gjest tejet domethënës i Presidentit Trump ndaj Kosovës, që forcon më tej marrëdhënien e Amerikës mike me popullin shqiptar, por që edhe jep një sinjal domethënës për sigurinë e përkatësinë e Kosovës në hapësirën e interesit të gjerë amerikan në botë. Edhe njëherë urime dhe dua të besoj se faktorët politikë të Kosovës, do ta çmojnë këtë dorë të shtrirë nga Presidenti i SHBA, si një gjest që nuk është aspak pa lidhje edhe me respektin për ty personalisht e për rolin tënd ndërkombëtarish”, deklaroi Rama.