Në ardhje të qeverisë Kurti I, u zotua rritja e cilësisë së jetës dhe mirëqenies së personave me aftësi të kufizuara.
Këtë deklaratë kryeministri, tashmë në detyrë, Albin Kurti, e bëri pikërisht në Javën Ndërkombëtare të të Shurdhërve dhe Ditën Ndërkombëtare të Gjuhës së Shenjave.
Madje vitin 2023 e shpalli Vitin e personave me aftësi të kufizuara.
Siç duket, premtimet s’i gjetën zbatim kryeministrit Kurti.
Kjo pasi gjatë mandatit të tij plotë, nuk u nxor një akt nënligjor që do t’i stimulonte kompanitë të punësonin persona me aftësi të kufizuar, raporton Kiks Kosova.
Kjo ishte paraparë, në bazë të nenit 18 të Ligjit për aftësimin, riaftësimin profesional dhe punësim, i cili lironte kompanitë nga pagesa e doganës dhe tatimit.
Në vitin 2016 ishte bërë ndryshim-plotësimi i ligjit bazë, ku përmes nenit 11 kërkohej të nxirrej një akt nënligjor për lehtësirat doganore e tatimore.
Nevojën e nxjerrjes së aktit nënligjor e potencojnë edhe njohës të drejtësisë.
Sfidë në Kosovë vazhdon të mbetet inkuadrimi në shoqëri i personave me aftësi të kufizuara, kjo për shkak të mungesës së kushteve elementare.
Madje, shpeshherë është lobuar për treg të hapur dhe të barabartë për këta persona. /Klan Kosova.
