Paneli Zgjedhor për Ankesa dhe Parashtresa ka rrëzuar të gjitha ankesat sa i përket shpalljes së rezultateve përfundimtare për zgjedhjet e 9 shkurtit nga KQZ-ja. Pasi në PZAP-ja refuzoi ankesat, tashmë është konsumuar edhe kjo procedurë. Ajo që ka mbetur është se nëse të pakënaqurit me këtë vendim, pra Vetëendosja e dërgon në Gjykatë Supreme lëndën, për të cilën ka afat 48 orë. Nëse kjo ndodh Supremja ka 96 orë në dispozicion për të nxjerrur një vendim. Pra, jemi veç edhe një hap larg certifikimit të rezultateve për zgjedhjet e 9 shkurtit.
Ankesat e VV-së
Asnjë provë të vetme…supozime…e pabazuar.
Kështu e gjeti verdiktin e vet ankesa më e përçudshme deri më sot e Lëvizjes Vetëvendosje drejtuar Panelit Zgjedhor për Ankesa dhe Parashtresa në lidhje me kërkesën për rinumërim të mbi 40 vendvotimeve në lidhje me votat e Bedri Hamzës të PDK-së.
Në ankesë Vetëvendosja vendvotimet i shkroi krejt “në Skenderaj” ndërsa asnjë prej tyre nuk ishte në Skenderaj – për çka del të ketë dërguar plotësim të ankesës, se ky ishte “një gabim teknik…i përvjedhur”.
E paargumentuar, e pabazuar – rrjedhimisht “refuzohet”, ishte vendimi i PZAP-së karshi kësaj ankese të LVV-së, që bërtiste qëllim tjetër: thjesht shtyrje indefinitivisht të certifikimit të rezultatit.
Qe qysh rodhi situata komike…
Dikush në PZAP do ta gjejë veten të djersitur dhe të provojë të mbajë frymën nga sikleti prej çfarë ankese kishte deponuar Lëvizja Vetëvendosje.
Pikësëpari ankesa kërkonte rinumërim të mbi 40 vendvotimeve “në Skenderaj” ndërsa asnjëra prej tyre nuk ishte në Skenderaj.
Rinumërimi në ato vendvotime, sipas tyre, duhet të bëhet sepse Bedri Hamza në ato vendvotime ka marrë “94 deri në 100%” të votave…mbajeni frymën…të vetë PDK-së,
Kjo në vendvotime ku PDK del të ketë marrë nga 5 deri në 10% të votës.
Dhe ky “94-100%” i Hamzës në ato vendvotime me 5-10% të PDK-së, simbas ankesës tyre, nuk përkon me trendin e gjithmbarshëm vendor…
Por, për krejt këto del se VV nuk ka dërguar asnjë provë.
Rrëzimi i ankesës së VV-së ndaj LDK-së
Paneli Zgjedhor për Ankesa dhe Parashtresa ka rrëzuar ankesën e Lëvizjes Vetëvendosje, e cila ka kërkuar anulimin e rezultatit të votimit me postë për subjektin politik Lidhja Demokratike e Kosovës.
Në vendimin e PZAP-së, të cilin e ka siguruar gazeta Nacionale, vlerësohet se ankesa e partisë në pushtet ka qenë e pabazuar.
Sipas vendimit, partia e Albin Kurit nuk e ka sjell asnjë provë për anulimin e këtyre votave.
“Refuzohet e pabazuar ankesa A.nr.641/2025 e datës 17.03.2025 e subjektit politik Lëvizja Vetëvendosje me seli në Prishtinë, paraqitur kundër vendimit të KQZ-së me Seli në Prishtinë, nr.01/727-2025 të datës 15 mars 2025, për Shpalljen e Rezultateve Përfundimtare për Zgjedhjet e Përgjithshme për Kuvendin e Republikës së Kosovës të datës 01.02.2025, në të cilën ka kërkuar që të anulohen rezultatet e votimit me postë për subjektin politik Lidhja Demokratike të Kosovë, gjithsejt 18 mijë e 933 vota dhe këto vota të largohen nga rezultatet përfundimtare të zgjedhjeve, ta udhëzoj KQZ-në që të përsërisë votimin me postë në tërësi si dhe t’i largoj nga lista e kandidatëve prej subjektit politik LDK kandidatët e cekur me emër e mbiemër, për shkak të manipulimit të votave të ardhura me postë dhe të mos e lejojnë subjektin politik LDK t’i zavendësoj kandidatët e larguar”, thuhet në vendimin e PZAP-së.
Më tej, në arsyetimin e vendimit thuhet se partia nuk pushtet nuk ka sjell prova bindëse në argumentimin e ankesës së saj.
PAZAP-ja ka vlerësuar se anulimi i rezultatit të votimit me postë dhe përsëritja e tij duhet të mbështetet në dëshmi të qarta.
“Në raport me këto pretendime në ankesë me asnjë provë bindëse nuk i ka dëshmuar se mbi cilat shkaqe e kërkon një gjë të tillë, pasi që anulimi i rezultatit të votimit me postë dhe përsëritja e tij duhet të mbështetet në dëshmi të qarta për manipulim, qoftë me rastin e dorëzimit apo me rastin e numërimit, e të cilat shkaqe parashturuesi i ankesës ka dështuar që t’i argumenotj”, është thënë në arsyetimin e vendimit.
Nëse ky vendim nuk i pëlqen partisë në pushtet, LVV-ja mund ta kontestoj vendimin në Gjykatën Suprem.
Ankesa ndaj vendimit të PZAP-së në Supreme duhet të bëhet brenda 48 orëve.
Pas shpalljes së rezultateve përfundimtare të Zgjedhjeve për Kuvendin e Republikës së Kosovës nga KQZ-ja, subjektet politike kanë dorëzuar disa ankesa në Panelin Zgjedhor për Ankesa dhe Parashtresa,.
Sipas njoftimit të PZAP-së, në këtë institucion janë parashtruar 6 ankesa.
Tri prej tyre janë parashtruar nga një kandidat për deputet i PDK-së, dy nga Lëvizja Vetëvendosje dhe një ankesë është parashtruar nga koalicioni PDAK-LPB.
Pjesa dërmuese e këtyre ankesave kanë të bëjnë me postë jashtë vendit.
Vetëvendosja “asnjë provë të vetme” për votat e Hamzës, PZAP ia rrëzon ankesën e përçudshme
