Pas zbulimit të mospërputhjeve të mëdha gjatë procesit të rinumërimit të votave, Zyra e Kryeprokurorit të Shtetit ka njoftuar sot fillimin e veprimeve hetimore për të dokumentuar manipulimet e mundshme zgjedhore.
Koordinatorja nacionale për zgjedhje, prokurorja Laura Pula, ka lëshuar një udhëzim për të gjitha prokuroritë themelore në vend që të nisin menjëherë grumbullimin e informatave dhe sigurimin e provave.
Sipas njoftimit, vendimi vjen pas evidentimit të parregullsive evidente gjatë numërimit të votave për kandidatët për deputetë brenda subjekteve politike.
Njoftimi i Prokurorisë:
Në të gjitha komunat ku ka përfunduar procesi i rinumërimit të votave do të fillohet me grumbullimin e informatave për keqpërdorimet në procesin zgjedhor
Prishtinë, 19 janar 2026 – Zyra e Kryeprokurorit të Shtetit informon opinionin publik se Prokurori i Shtetit në vazhdimësi ka monitoruar nga jashtë procesin e rinumërimit të rezultateve zgjedhore.
Koordinatorja nacionale për zgjedhje, prokuroja Laura Pula, pas evidentimit të mospërputhjeve të votave gjatë numërimit brenda subjekteve politike për deputet, në rajone të ndryshme të Republikës së Kosovës, ka kërkuar nga kryeprokurorët e të gjitha prokurorive themelore që në të gjitha komunat, ku ka përfunduar procesi i rinumërimit të votave, të fillojnë grumbullimin e informatave të nevojshme dhe të sigurojnë prova relevante, që vërtetojnë kryerjen e ndonjë vepre penale që ndërlidhet me procesin zgjedhor.
Po ashtu, koordinatorja nacionale për zgjedhje, prokuroja Laura Pula ka kërkuar që edhe në komunat ku ende nuk ka përfunduar procesi i rinumërimit të votave që menjëherë pas përfundimit të këtij procesi të fillohet nga prokuroritë përkatëse procesi i grumbullimit të provave të nevojshme.
Prokurori i Shtetit do të mbetet i angazhuar për ta mbrojtur votën e lirë të qytetarëve, dhe do të hetoj çdo rast, për të cilin kanë dyshime është keqpërdorë – falsifikuar vota në çfarëdo mënyre dhe nga kushdo qoftë.
