Prokuroria Themelore në Mitrovicë ka kërkuar paraburgim për policin e Njësisë Speciale, M.L., i dyshuar për “keqpërdorim të pozitës zyrtare”, “zbulim të fshehtësisë zyrtare” dhe vepra të tjera penale. Ai dyshohet se ka keqpërdorur detyrën për përfitime pasurore, ka zbuluar informacion hetimor, ka mbajtur municion pa leje dhe ka përdorur armën në një lokal nate.
Gjatë bastisjes në shtëpinë dhe veturën e tij, janë sekuestruar dy telefona dhe fishekë. Seanca për caktimin e paraburgimit pritet të mbahet në Gjykatën Themelore të Mitrovicës.
E plotë
Kërkesë për caktimin e paraburgimit për policin e arrestuar në Vushtrri
Mitrovicë, 04 shtator 2025 – Prokuroria Themelore në Mitrovicë – Departamenti i Krimeve të Rënda, ka kërkuar nga Gjykata Themelore në Mitrovicë caktimin e paraburgimit për të pandehurin me iniciale M.L., polic i Njësisë Speciale Operative në Mitrovicë, për shkak të dyshimit për kryerjen e veprave penale “Keqpërdorimi i pozitës apo autoritetit zyrtar”, “Zbulimi i fshehtësisë zyrtare”, “Mbajtja në pronësi, kontroll ose posedim të paautorizuar të armëve”, dhe “Përdorimi i armës apo mjetit të rrezikshëm”.
Ekziston dyshimi se me datë 02 shtator 2025 në fshatin Ropicë të Vushtrrisë, i pandehuri me dashje e duke e shfrytëzuar detyrën dhe autoritetin zyrtar si zyrtar policor, me qëllim të përfitimit të dobisë pasurore për vete dhe personin tjetër, shkon tek shtëpia e të pandehurit K.M., dhe e merr dhe e largon nga shtëpia duke shkuar në drejtim të Prishtinës.
Po ashtu, me datë 18 qershor 2025 i pandehuri M.L., kontaktohet përmes telefonit nga i pandehuri K.M., i cili e vëren një dron mbi shtëpinë e tij dhe e pyet të pandehurin M.L., se a është duke u hetuar nga policia, i dyshuari – zyrtar policor e informon se në rast kur ai është duke u hetuar ose të ketë veprime tjera do ta njoftojë.
Po ashtu, i pandehuri M.L., në shtëpinë e tij në Vushtrri ka mbajtur një sasi të fishekëve, si dhe në një lokal nate i njëjti përdor armën e tij duke shtënë brenda lokalit shtatë – tetë here, si dhe një ditë tjetër shihet duke shtënë tre herë, pamje këto të publikuara nëpër rrjete sociale, të gjitha këto veprime në kundërshtim me Ligjin mbi armët.
Të pandehurit, gjatë bastisjes së mbrëmshme në shtëpinë dhe veturën e tij, i janë sekuestruar dy telefona dhe fishekë.
Seanca për caktimin e paraburgimit për të pandehurin do të mbahet pranë Gjykatës Themelore në Mitrovicë.
