Prokuroria Themelore në Prishtinë ka njoftuar se rasti i njohur në publik si “Albkings” është trajtuar me prioritetin dhe seriozitetin më të madh nga ana e Prokurorisë.
Në një njoftim zyrtar thuhet se Prokurori i Shtetit ka përcjellur me vëmendje në vazhdimësi publikimet e ndryshme mediatike në lidhje me këtë rast, në veçanti këtu edhe së fundi publikimin e lajmit në portalin “Insajderi” me titull “Shtetit i iki Edin Nevzadi, rihapet një grup tjetër sikur “Albkings”/Pamjet tronditëse” dhe njofton publikun se lajme të tilla janë të pavërteta.
“Prokurori i Shtetit në bashkëpunim me Policinë e Kosovës gjatë gjithë fazës së hetimit, por edhe pas ngritjes së aktit akuzues ka përcjell me kujdes dhe trajtuar me vëmendje çdo informacion mbi mundësinë e rihapjes së këtij grupi apo grupeve tjera me përmbajtje të ngjashme, informacione këto të cilat pas verifikimit kanë rezultuar të pavërteta”, thuhet në njoftim.
Më këtë rast, Prokuroria Themelore në Prishtinë ka bërë apel për të gjitha mjetet informuese të kenë parasysh me rastin e plasimit të lajmeve të mos publikojnë informata të pasakta, me qëllim të dezinformimit të publikut.
