Komuna e Prishtinës për disa nga projektet e saj ka dhënë 10 përqind të vlerës paraprakisht kompanive kontraktuese si garanci për fillimin e punimeve. E megjithatë, në rastet kur këto punime ndërpriten, pjesë e kontratës janë edhe detyrimet financiare çka mund të dëmtojnë buxhetin e komunës. Nga KDI shprehen se përqindjet e dhëna mund të rrisin detyrimet e komunës në rast të mosmbarëvajtjes së procedurave por nga opozita, thonë se tanimë kjo është bërë praktikë e kryetarit Rama.
Punimet iu lanë në gjysmë një ditë më parë.
Por, kompania e kontraktuar për punimet në “Xhorxh Bush” tanimë ka marrë 10% të vlerës së kontratës prej pak më shumë se 18 milionë.
Ndonëse një praktikë e tillë është në pajtim me Ligjin për Prokurimin Publik, si garanci për kompaninë kontraktuese e njëheri, sipas kontratës për “Xhorxh Bush”-in, për materialet e nevojshme për punë, ndërprerja e tyre siç ndodhi ditën e djeshme mund t’i kushtoj komunës.
“Ka rreziqet e veta sidomos në Kosovë kur projektet dështojnë dhe përfundojnë në procedura gjyqësore dhe mbetet ky kthimi i 10% peng i vendimit përfundimtar nga gjykata. Një rast të tillë ku e kemi diskutabile është bulevardi “Xhorxh Bush”. Kontrata parasheh edhe detyrime financiare për kompensim të kontraktorit nëse shkëputet kontrata por kemi vonesa që shkaktohen edhe nga procedurat e që rrisin barrën. Kjo i bie që përpos që kemi rrezikuar 1.8 milionëshin e parapaguar për të, mund të vonohen. Çdo vonesë është humbje në investime dhe zhvlerësim i parasë publike”, ka thënë Diana Metushi, hulumtuese në KDI.
Këtë e thotë edhe kontrata e cila parasheh që përqindja do të zbatohet për vlerën e punëve të papërfunduara që nënkupton, kosto shtesë për autoritetin kontraktues, komunën.
Sipas Metushit, faji mbetet i dyanshëm duke qenë se projekti ishte bërë publik nga viti i kaluar e MKRS nuk kishte reaguar.
Sipas opozitës në Komunë, tanimë kjo është kthyer në procedurë të zakonshme.
“Është pjesë e skemës kur bëhen pumët e paligjshme. Me avancin prej 10% ka ndodhë edhe te lidhja e Arbërisë me Pallatin e Rinisë. Kjo shërben në dy drejtime, e rrit shkallën e investimeve kapitale sepse llogaritet dhe në anën tjetër, s’ka punë. Dyshimet tona janë se bëhet fjalë për keqpërdorime, për zhvatje. Po jepen pare e spo shohim punë. Ne jemi të zhgënjyer me hetuesinë e prokurorinë. Kemi ngritur dhjetëra kallëxime penale që kanë të bëjnë me keqpërdorime që ne besojmë se janë por s’kemi veprime konkret”, ka thënë Gëzim Sveçla, shef i asamblistëve të LVV-së në Prishtinë.
“E rëndon buxhetin sepse kontratat e nënshkruara ku nuk shihen rezultatet, ato janë barrë që kompanitë mund t’i marrin mjetet përmes përmbaruesve. Vitin që shkojmë kemi më shumë se 10 milionë euro që janë marrë nga përmbaruesit nga buxheti i komunës së Prishtinës. Detyrimet kontigjente po rriten dhe kjo është një problem sepse lë barrë financiare për vitet e ardhshme”, ka thënë, Leutrim Retkoceri, shef i asamblistëve të PDK-së.
Instituti i Trashëgimisë Kulturore së fundmi ia ndërpreu punën Komunës meqenëse nuk kishin marr leje në këtë institucion siç e parasheh Ligji për shkak se në hapësirën ku do të intervenohet janë disa objekte të trashëgimisë kulturore.
