Cili do të jetë fati i Adrien Rabiot? Ende nuk ka një përgjigje të qartë. Pas përplasjes së ashpër me fjalë dhe përleshjes fizike në dhomat e zhveshjes me Jonathan Rowe, ky i fundit u largua nga Olympique Marseille për t’u transferuar te Bologna, ndërsa ish-mesfushori i Juventusit mbetet pjesë e klubit francez, por i përjashtuar nga grupi. Me kontratë që skadon pas një viti, situata duhet të sqarohet sa më shpejt, për të shmangur rrezikun që lojtari të largohet falas.
Presidenti i klubit, Pablo Longoria, në një intervistë për “Sky Sport”, pas shortit të Champions League në Monte Carlo, e komentoi kështu çështjen: “Për momentin është një situatë e thjeshtë. Pas asaj që ndodhi, ne kemi folur. Tani, për ne është thelbësore të ketë biseda të hapura, sinqeritet dhe të kuptojmë çfarë dëshiron secili”.
Ai shtoi më tej: “Si klub, ju e njihni eksperiencën tonë dhe na ndiqni shumë nga Italia. Te Olympique Marseille ka një çështje shumë të rëndësishme që duhet të jetë e qartë: rregullat dhe parimet e autoritetit. Ato ekzistojnë gjithmonë në tri nivele; lojtar, trajner dhe klub. Për ne ky është parimi bazë i menaxhimit”.
The post Presidenti i OM shpjegon: Situata e Rabiot është e thjeshtë, duhet të dimë çfarë do secili appeared first on Telesport.
