Policia e Kosovës sqaroi rolin e saj në asistimin e Inspeksionit të Komunës së Prishtinës në sheshin “Xhorxh Bush”

Komuna e Prishtinës ka nisur sërish punimet në sheshin “Xhorxh Bush”, ndonëse ato ishin ndërprerë nga Inspektorati I Trashëgimisë Kulturore dy herë.

Këto punime të rinisura ka dalë t’i shoh nga afër vetë kryetari i Prishtinës, Përparim Rama, i cili ka thënë se janë brenda kornizave ligjore dhe punimet do të vazhdojnë e nuk do të ndalen.

Drejtoria Rajonale e Policisë së Kosovës – Prishtinë, në një njoftim për opinionin publik, bën të ditur se sot, zyrtarët policorë ishin të pranishëm në sheshin “George Bush” në Prishtinë për të asistuar Drejtorinë e Inspeksionit të Komunës së Prishtinës në aktivitete të planifikuara jashtë kuadrit të kryerjes së punimeve në atë zonë.

“Zyrtarët policorë veprojnë në bazë të parimeve të ligjshmërisë, proporcionalitetit dhe neutralitetit, duke respektuar në çdo rast ndarjen e pushteteve dhe kompetencat e institucioneve të tjera. Çdo pretendim që sugjeron tejkalim të kompetencave nga ana e Policisë së Kosovës është i pabazuar dhe bie ndesh me misionin tonë për të vepruar në mënyrë të paanshme dhe në përputhje me ligjin.​ Policia e Kosovës mbetet e përkushtuar për të ofruar mbështetje institucionale në përputhje me ligjin dhe për të garantuar sigurinë publike, duke respektuar gjithmonë kufijtë e kompetencave të saj”, thuhet në reagimin e policisë.