Posedimi i armëve ilegale është bërë dukuri shqetësuese në vendin tonë, pasi Policia vazhdimisht has në persona të cilët mbajnë armë zjarri e të ftohta, duke u cenuar kështu siguria publike.
Një rast i posedimit të paautorizuar të armës është zbuluar të premten në fshatin Rogovë të Gjakovës, ku një person është kapur me armë zjarri në brez, gjatë një kontrolli policor.
Burimet e Gazetës Sinjali bëjnë me dije se zyrtarët policorë kanë ndalur të dyshuarin derisa ishte veturën e tij dhe gjatë kontrollit i dyshuari u ka treguar policëve se posedon një armë zjarri dhe një karikator me 18 fishekë.
Arma ishte vendosur në brez, në këllëf, ndërsa i dyshuari ka deklaruar se posedon leje për gjuajtje në poligon, por jo për ta mbajtur armën me vete në publik.
Në vendin e ngjarjes ka dalë njësia e hetimeve, e cila ka bërë sekuestrimin e armës dhe municionit.
Pas intervistimit në stacion policor, me urdhër të prokurorit kujdestar, i dyshuari është liruar në procedurë të rregullt.
Rasti është iniciuar si “Mbajtje në pronësi, kontroll ose posedim të paautorizuar të armës”.
