Një avion luftarak indian vendas u rrëzua gjatë shfaqjes ajrore, Dubai Airshow, në Emiratet e Bashkuara Arabe të premten, duke vrarë pilotin e tij, njoftoi Forca Ajrore Indiane (IAF) në një deklaratë.
“Në një shfaqje ajrore gjatë Dubai Air Show, një avion Tejas i IAF është përfshirë në një aksident. Piloti pësoi lëndime fatale në aksident”, tha IAF në deklaratë.
Duke shprehur “keqardhje të thellë” për humbjen e jetës, IAF theksoi se “qëndron fuqimisht pranë familjes së prekur në këtë kohë zieje”.
IAF do të “sqarojë shkakun e aksidentit”, shtoi deklarata.
Më parë, video në mediat sociale treguan avionin me një vend të vetëm duke u rrëzuar gjatë Dubai Airshow, duke lëshuar sasi të mëdha tymi.
Sipas transmetuesit indian NDTV, rrëzimi ndodhi rreth orës 14:10 me kohë lokale, para se tymi i dendur të mbulonte vendin në Aeroportin Ndërkombëtar Al Maktoum.
Avioni është zhvilluar nga Hindustan Aeronautics Limited, dhe incidenti në Dubai Airshow shënon rrëzimin e dytë të një avioni Tejas në më pak se dy vjet, shkruan raporti, sipas Anadolu.
Në mars të vitit të kaluar, një avion Tejas u rrëzua në shtetin perëndimor të Indisë, Rajasthan – “aksidenti i parë i këtij lloji në historinë 23-vjeçare të avionit që nga fluturimi i tij i parë testues në 2001”, ndërsa piloti kishte arritur të shpëtonte duke përdorur sistemin e katapultimit.
