Nënkryetari i AAK-së, Ardian Gjini, ka folur në lidhje me peshkimin e deputetëve të Kuvendit të Kosovës, duke thënë se ka raste të shumta që deputetët kanë ndërruar mendjen.
Gjini tha se në AAK asnjë deputet nuk peshkohet, askush nuk e han karremin.
“Në Kosovë ka pasur raste të shumta që deputetët e kanë ndërruar mendjen, kanë ndërruar kamp dhe asnjëherë nuk është përceptuar bash mirë ashtu edhe prej publikut. Po besoj që peshkohen, ka disa që peshkohen dhe ka tjerë që nuk e hanë karremin. Në AAK askush nuk e han karremin”, tha Gjini.
Gjini, duke folur për qëndrimin e partisë së tij ndaj deklaratës së Fatmir Limajt, ka theksuar se, megjithëse AAK-ja dhe Nisma kishin garuar së bashku në zgjedhje, kjo nuk do të kishte qenë një problem nëse palët do të kishin vazhduar të qëndronin të bashkuara pas zgjedhjeve.
Sipas Gjinit, nëse Nisma dëshiron të ndjekë një rrugë të pavarur, kjo është e kuptueshme, por ajo që e befasoi AAK-në ishte që Limaj nuk e kishte diskutuar paraprakisht këtë vendim me ta.
“Kemi garuar bashkë, nuk do të ishte keq nëse do të mbeteshim bashkë, por nëse Nisma dëshiron të ndjekë rrugën e vet, është në rregull. Megjithatë, pas zgjedhjeve, deklarata e Limajt na ka befasuar, pasi nuk kishim pasur asnjë bisedë paraprake me të. Do të ishte më korrekte që të kishim biseduar së pari, por ndodhi kështu dhe nuk është përceptuar mirë në Aleancë. Kjo ngjarje do të mbetet për t’u parë si do të zhvillohet në ditët në vijim. Nuk është një ndjenjë e mirë të dëgjosh një deklaratë të tillë pa pasur një bisedë të mëparshme me ne. Aleanca ka kontribuar shumë për të ndihmuar Nismën që të kalojë pragun zgjedhor, dhe kjo është parë si një interes i përbashkët”, tha Gjini, për RTV21.
Ai ka komentuar deklaratwn e deputetit të Lëvizjes Vetëvendosje, Artan Abrashi, i cili tha ”deklaratat e partive opozitare për të mos bashkëpunuar më VV-në nuk i marrin seriozisht”.
Gjini tha se si deputetë e pozitës ashtu edhe të opozitës janë zgjedhur nga populli i Kosovës, teksa shtoi se së shpejti do ”të vijë dita kur ata do të ndihen të turpëruar”.
”Nuk kemi pasur asnjë takim me VV-në. Si strukturë jo, por nuk e di nëse ndonjë deputet është takuar me ndonjë deputet. Munden me qenë [takimet] private”, tha Gjini.
Ai ka deklaruar se partia e tij do të mbështesë çdo kandidat për kryetar të Kuvendit, të propozuar nga partia fituese.
”Besoj që po, kjo temë as nuk është diskutuar në AAK, me më pyet mua do të votohet kushdo që do të propozohet për kryetar të Kuvendit nga partia fituese”, tha Gjini.
Ai tha se AAK do të lobojë aq sa mundet për ta ndihmuar opozitën për ta formuar një Qeveri.
”Kësaj radhe AAK nuk ka vë as kushte, por mendojmë që është e rëndësishme për Kosovën me pas ndërrim të Qeverisë”, tha Gjini.
