Ministri maqedonas i Shëndetësisë, Arben Taravari, pas një takimi të shtabit të krizës, tha se të gjithë pacientët në spitalet maqedonase, të cilët u lënduan si pasojë e zjarrit të para një jave në diskotekën Pulse në Koçan, janë në gjendje të mirë dhe stabile.
Nëntë pacientë pritet të lirohen në fillim të javës, pasi t’i nënshtrohen të gjitha testeve toksikologjike dhe psikologjike.
“Aktualisht, 115 pacientë janë jashtë vendit. Pesë persona janë ende në gjendje kritike, por gjendja e tyre ndryshon. Prej shtatë ditësh nuk ka pasur të vdekur të tjerë, askush nuk ka ndërruar jetë nga lëndimet. Presim përmirësime të mëtejshme. Javën e ardhshme presim kthimin e pacientëve të tjerë në vend”, tha Taravari, sipas mediave maqedonase.
Në zjarrin në diskotekën Pulse humbën jetën 59 persona dhe pothuajse 200 të tjerë u lënduan. Ndër viktimat janë gjashtë të mitur. Sipas prokurorisë maqedonase, tre prej tyre ishin 16 vjeç dhe tre të tjerë 17 vjeç. Viktima më e vjetër ishte 48 vjeç.
Zjarri shpërtheu gjatë koncertit të bendit DNK, kur fishekzjarret ndezën tavanin dhe çatinë e diskotekës.
