Deputetja e LDK-së, Rrezarta Krasniqi ka reaguar pas rinumërimit të votave të LDK-së në komunën e Vushtrrisë, e që sipas saj është vërtetuar ajo për të cilën dhe ishte ankuar në Prokurinë Themelore të Mitrovicës, për manipulim votash nga bashkëpartiaku Xhafer Tahiri.
Krasniqi thotë se nga rinumërimi vërtetohet ndërhyrje “me kimik” në fletëvotim, si dhe shton se janë shtuar vota në sistem pa qenë fare në kuti, si dhe parregullësi të tjera.
Ajo thotë se për shkak të këtyre ndërhyrjeve ajo si kandidate është dëmtuar në vota.
“Asnjëherë nuk ka qenë me rëndësi interesi personal, por fenomeni që me gjasë nuk ka ndodhur vetëm në Vushtrri, por në shumë qendra të tjera dhe ky proces ka qenë një dështim i madh”, shkruan mes tjerash Krasniqi.
Reagimi:
Katundi që duket kallauz nuk do
Nga rinumërimi që ka ndodhur në QNR është vertetuar ajo që kam ngritur si shqetësim që nga 16 shkurti kur ende nuk ka pasur dijeni se kush do të jetë deputet ose sa vota i ka marrë njëri ose tjetri deputet.
Nga ky rinumrin po vërtetohet ndryshimi i votave për kandidat të caktuar ndërhyrje në fletvotim (me kimik),janë shtuar vota në sistem pa qenë fare në kuti dhe shumë parregullësi të tjera, ku për shkak të këtyre ndërhyrjeve jam dëmtuar personalisht me dhjetëra vota bashkë me disa kandidatë të tjerë në listen tonë dhe padyshim vërehet se edhe janë shtuar vota disa kandidatëve të tjerë, ku njërit kandidat nga Vushtrria i kanë shtuar 88 vota të cilat nuk i kishte marrë nga vullneti i qytetarëve por nga njerëzit e tij në QNR.
Sa i përket akuzave nga ata që kanë manipuluar me vota, se kinse kam dalë 1 votë më pak, aty vërehet qartë se ajo votë nuk është më pak, por ata kanë tentuar ta shtojnë edhe kandidatin në fjalë dhe ai fletëvotim është shpallur i pavlefshëm sikurse janë shpallur mbi 20 fletëvotime vetem ne nje vendvotim që kanë ndikuar në rezultatin e shumë kandidatëve.
Për detaje më të hollësishme nga shtrembërimi i vullnetit të qytetarëve të Vushtrrisë për mua si kandidate e Lidhjes Demokratike të Kosovës dhe disa kolegëve të tjerë do të njoftoheni pas raportit të plotë që do ta publikoj prokuroria.
Asnjëherë nuk ka qenë me rëndësi interesi personal, por fenomeni që me gjasë nuk ka ndodhur vetëm në Vushtrri, por në shumë qendra të tjera dhe ky proces ka qenë një dështim i madh.
Demokracia për mua, për qytetarët e Vushtrrisë dhe votuesit e LDK-së është më e vlefshme se ambiciet personale tuaja.
Drejtësia do të triumfojë!
