Punësimi i kushërinjve dhe nipërve të kryetarit të Komunës së Shtimes, familjarëve të drejtorëve komunalë, kryesuesit e anëtarëve të Kuvendit, nuk janë rastet e para të nepotizmit në komunën e udhëhequr nga Lëvizja Vetëvendosje.
Opozita në këtë komunë e akuzon Qemajl Aliun se përveç që lejoi e favorizoi punësimet më të njohshëm, ai ishte edhe nismëtar i tyre.
Kryetari i degës së PDK-së në Shtime, Rraman Jakupi, tha për Kiksin se sinjalizues të nepotizmit u bënë vetë qytetarët e kësaj komune të cilët aplikuan në këto konkurse dhe pohuan se nuk u pranuan, pasi vendin e tyre e zunë nga familjarët e zyrtarëve komunalë.
Madje, këto padrejtësi në konkurse ai thotë se i konstatoi edhe Inspektorati i Punës dhe për to, Komuna mori edhe dënime.
E nepotizmi sipas opozitës, nuk ka qenë problemi i vetëm në këtë komunë.
Sipas tij, që nga marrja e pushtetit lokal në 6 mujorin e dytë të 2021-ës, qeverisja e Shtimes nuk ka pasë stabilitet politik.
E PDK-ja nuk është partia e vetme që hedh akuza për keqqeverisje të Vetëvendosjes në Shtime.
Në një mendje me të është edhe Lëvizja për Bashkim, parti e cila e përkrahu Aliun në fushatën e 2021-ës. Asamblisti i këtij subjekti politik, Rexhep Gashi, tha për Kiks Kosovën se janë zhgënjyer sepse VV-ja nuk mbajti asnjë nga premtimet e fushatës.
Sipas Gashit, ndodhi e kundërta e asaj që u premtua në fushatë dhe qytetarët ndonëse po përballen vetë me këto padrejtësi, hezitojnë të flasin publikisht.
Prandaj, ai thotë se është obligimi i asamblistëve që të jenë zëri i tyre. /Klankosova.tv
