Mbrëmjen që e la Italinë jashtë Botërorit për herën e tretë radhazi, në Bosnje lindi një tjetër protagonist. Nuk luajti asnjë minutë, nuk ishte në listë dhe nuk shënoi asnjë nga penalltitë që rrëzuan axurrët në Zenicë. Megjithatë, për tifozët boshnjakë u bë një hero i vogël. Quhet Afan Cizmic, është 14 vjeç, mbledhës topash pas porte në finalen e “play off”-it të Botërorit, por luan edhe si sulmues me të rinjtë e NK Celik.
Është pikërisht djali që, në kulmin e serisë së penalltive Bosnje-Itali, mori fletën me udhëzimet për goditësit, që Gianluigi Donnarumma e mbante pranë peshqirit. Historia e tij u përhap menjëherë në Bosnje, sepse përshtatet në mënyrë perfekte me kaosin e atyre minutave. Pas gabimit të parë italian, Donnarumma dhe Nikola Vasilj kishin debatuar rreth shënimeve të tyre për goditësit e penalltive. Sipas rindërtimeve të situatës, portieri italian kishte grisur nga zemërimi fletën e kolegut boshnjak, duke shkaktuar reagimin e Vasilj dhe tension të mëtejshëm pranë portës.
Në atë rrëmujë, ndërsa vëmendja ishte te dy portierët, pritësit e topave gjetën dhe fshehën edhe fletën e Donnarummës. Nëse portiere boshnjak mori fletën rezervë nga stafi teknik, Donnarumma nuk priti dot asnjë penallti. Që ta kthente këtë prapaskenë në një rast mediatik mendoi “Face TV”, që e gjeti djalin dhe e mori në studio. Aty, Afani u prezantua si “njeriu i trembëdhjetë” i Bosnjes në Zenica. Televizioni e përshkroi si një djalë me personalitet të madh, i dalluar edhe për paraqitjet me të rinjtë e NK Celik: 18 gola dhe 14 asistime në 12 ndeshje, shifra që e tregojnë si një talent për t’u ndjekur.
Detaji që ndezi më shumë imagjinatën e tifozëve ishte rrëfimi i tij. Afani shpjegoi se e kishte vënë re menjëherë fletën në duart e Donnarummës dhe kishte kuptuar rëndësinë e saj. Duke e treguar në TV, tha se brenda kishte informacione të sakta: këmba e preferuar, zakonet në vrapim, drejtimi më i shpeshtë i goditjes dhe sinjale përpara gjuajtjes. Në intervistë ai tha: “Do të thotë shumë. Kur e mora këtë fletë, Donnarumma u hodh majtas të pesë herët. U mbështet te fati”.
Ai shtoi: “Kur u ktheva në shtëpi, ia tregova babait. Vendosëm ta nxjerrim në ankand dhe të ardhurat t’i japim për bamirësi”. Djaloshi foli edhe për reagimin e kapitenit italian: “Ishte shumë i zhgënjyer dhe i zemëruar. Mori peshqirin dhe pa që fleta nuk ishte më, e kërkoi por nuk e gjeti”.
Më pas, rrugëtimi drejt famës në rrjetet sociale ishte i menjëhershëm. Në Bosnje, videoja dhe fytyra e Afan u shpërndanë kudo, duke e kthyer në “maskotë”. Komenti më i zakonshëm: “Ta çojmë në Botëror”. Në Bosnje fleta është bërë si një trofe, ndërsa për Italinë mbetet një nga imazhet më të hidhura të natës në Zenicë.
View this post on Instagram
The post “Pa atë fletë…”, 14-vjeçari që ‘mashtroi’ Donnarummën është bërë hero kombëtar në Bosnje: “Ta çojmë në Botëror” appeared first on Telesport.
