Presidentja e Kosovës, Vjosa Osmani, ka komentuar situatën e bllokadës për konstituimin e Kuvendit, duke theksuar se votimi i fshehtë është i mundur nëse arrihet konsensus ndërmjet deputetëve për këtë formë të votimit.
“Konstatimi i ekipit tim ligjor, me të cilin unë pajtohem, është që në qoftë se lexohet në tërësi aktgjykimi, votimi i fshehtë nuk përjashtohet si mundësi. Megjithatë për të kërkohet konsensusi i deputetëve. Kjo nënkupton që duhet të ketë vendim të seancës para se të shkohet te një mënyrë e tillë”, deklaroi Osmani, pas ceremonisë së betimit të kadetëve të rinj të Forcës së Sigurisë së Kosovës.
Tutje e para e shtetit paralajmëroi pasoja juridike në rast se Kuvendi nuk konstituohet brenda 30 ditëve, siç ka vendosur Gjykata Kushtetuese.
“Planifikoj në qoftë se nuk ka konstituim të Kuvendit shumë shpejt që t’i drejtohem Gjykatës Kushtetuese me kërkesë për sqarim lidhur me atë se çfarë pas 30 ditësh. Sepse duhet të sqarohet se cila është pasoja juridike e mos kryerjes së detyrimit kushtetues të konstituimit të Kuvendit brenda 30 ditësh, sepse duhet të ketë pasoja juridike. Do të flas më gjatë kur t’i përfundojë takimet me partitë politike lidhur edhe me përmbajtjen e takimeve por edhe lidhur me planet që i kemi gjatë ditëve në vijim. Nuk mund të presim që gjykata të thotë: mirë, pas 30 ditësh vazhdoni njësoj, takohuni çdo dy ditë dhe mos bëni asgjë. Nuk pres që do të ketë diçka të tillë”, shtoi Osmani.
Në përpjekje për të gjetur zgjidhje, Osmani ka zhvilluar takime konsultative të mërkurën dhe të enjten me liderët e partive politike Albin Kurti (LVV), Memli Krasniqi (PDK), Lumir Abdixhiku (LDK), Ramush Haradinaj (AAK) dhe atyre të nga komunitetet joshumicë.
Ajo tha se megjithëse qëndrimet e partive mbeten “diametralisht të kundërta”, kjo nuk e përjashton mundësinë e afrimeve të reja gjatë ditëve në vijim.
“Kemi pasur takime të mira por natyrisht që partitë kryesore i kanë qëndrimet ende diametralisht të kundërta, por kjo nuk do të thotë që brenda këtij afati nuk do të ketë afrim. Ka për disa gjëra që mund të ketë pajtim dhe unë do të shpresoja që të ketë sepse mendoj që bllokada tani tek lloji i votimit është shumë shumë jo racionale”, theksoi presidentja, teksa u bëri thirrje liderëve të partive që të gjejnë një zgjidhje deri në fund të muajit korrik, për të mundësuar konstituimin e legjislaturës së nëntë.
Aktgjykimi i Gjykatës Kushtetuese e ka vendosur datën 26 korrik si afatin e fundit për përmbylljen e këtij procesi.
The post Osmani: Votimi i fshehtë nuk përjashtohet si mundësi, por kërkon konsensus appeared first on Kosovapost.net.
