OKB-ja ka deklaruar se “pauzat taktike” të njëanshme të Izraelit në Rripin e Gazës nuk janë të mjaftueshme për të adresuar shkallën e nevojave humanitare, transmeton Anadolu.
Duke cituar Zyrën për Koordinimin e Çështjeve Humanitare (OCHA), zëdhënësi i OKB-së, Farhan Haq, gjatë një konference për media theksoi se është “më e nevojshme se kurrë një armëpushim i përhershëm”.
“Pauzat taktike të njëanshme nuk lejojnë rrjedhën e vazhdueshme të furnizimeve që nevojiten për të përmbushur nivelet e mëdha të nevojës në Gaza”, tha Haq.
Haq theksoi se OKB-ja dhe partnerët e saj po shfrytëzojnë çdo mundësi për të shpërndarë ndihmë, por “kushtet për shpërndarjen e ndihmës dhe furnizimeve janë shumë larg të qenit të mjaftueshme.”
“Katër ditë pas fillimit të pauzave taktike në Gaza të shpallura nga autoritetet izraelite, ende po shohim viktima mes atyre që kërkojnë ndihmë, si dhe më shumë vdekje për shkak të urisë dhe kequshqyerjes”, tha ai, duke shtuar se “prindërit vazhdojnë të luftojnë për të shpëtuar fëmijët e tyre që po vdesin nga uria”.
Duke theksuar se edhe punonjësit humanitarë janë të prekur, Haq raportoi për “ngarkesë të lartë pune, rraskapitje dhe lodhje, kryesisht për shkak të mungesës së ushqimit tek punonjësit në vijën e parë, si dhe te punonjësit e shërbimeve të shëndetit mendor dhe mbështetjes psikologjike”.
Ai përsëriti se “hyrjet aktuale të karburantit janë të pamjaftueshme për të përmbushur nevojat kritike për shpëtimin e jetës dhe përfaqësojnë vetëm një pikë në oqeanin e nevojave”.
Sa i përket hedhjes së ndihmave nga ajri për Gazën, Haq tha: “Nuk do t’i kthejmë shpinën asnjë përpjekjeje për të sjellë ndihmë në mënyrë të sigurt te njerëzit, por është krejtësisht e pamjaftueshme të mbështetemi në këtë mekanizëm”.
Ai shtoi se OKB-ja nuk është pjesë e procesit të hedhjes nga ajri, i cili përfshin “një sërë marrëveshjesh dypalëshe”.
“OCHA rithekson se të gjitha kalimet kufitare duhet të jenë të hapura dhe mallrat humanitare dhe ato tregtare duhet të rrjedhin lirshëm”, tha ai.
Sipas shifrave më të fundit të Ministrisë së Shëndetësisë, të paktën 1.239 persona janë vrarë dhe mbi 8.152 të tjerë janë plagosur nga zjarri i ushtrisë izraelite gjatë kërkimit të ndihmave në Gaza që nga 27 maji, kur filloi veprimtaria e Fondacionit Humanitar të Gazës, një projekt shumë i diskutueshëm.
Duke refuzuar thirrjet ndërkombëtare për armëpushim, ushtria izraelite vazhdon me ofensivën brutale në Gaza që nga 7 tetori i vitit 2023, duke vrarë të paktën 60 mijë palestinezë. Bombardimet e pandërprera kanë shkatërruar enklavën dhe kanë shkaktuar vdekje nga uria.
Në nëntor të vitit kaluar, Gjykata Penale Ndërkombëtare lëshoi urdhërarreste ndaj kryeministrit izraelit, Benjamin Netanyahu dhe ish-ministrit të Mbrojtjes, Yoav Gallant, duke i akuzuar për krime lufte dhe krime kundër njerëzimit në Gaza.
Izraeli gjithashtu përballet me një padi gjenocidi në Gjykatën Ndërkombëtare të Drejtësisë për luftën në enklavën palestineze.
The post OKB apelon për armëpushim të përhershëm: “Pauzat taktike” të Iz*raelit nuk mjaftojnë për të përmbushur nevojat në Ga*za appeared first on Kosovapost.net.
