Sulmuesi anësori i Paris Saint-Germain, Khvicha Kvaratskhelia nuk është i trembur nga përballja me Liverpoolin në “Anfield Road”, pavarësisht avantazhit 1-0 të Reds në ndeshjen e parë në Ligën e Kampionëve.
Kvaratskhelia beson se të luash në stadiumin ikonik është mjaft motivim.
“Kur luani në Anfield kundër Liverpoolit, nuk keni nevojë të motivoni veten aq shumë. E keni tashmë brenda”, deklaroi fillimisht ai.
Gjeorgjiani ka besim se PSG mund të përmbysë deficitin dhe të sigurojë një vend në çerekfinale.
“Nuk ka rëndësi nëse luajmë në Anfield apo në Paris. Qëllimi ynë është të fitojmë nesër. Ne do të japim gjithçka për këtë”, nënvizoi ai.
PSG shkon në Anfield me vrull pas një fitoreje ndaj Rennes me rezultat 4-1 të shtunën.
Pavarësisht fitores së ngushtë të Liverpoolit në ndeshjen e parë, Kvaratskhelia mbetet optimist për shanset e PSG-së për të kthyer rezultatin, pasi skuadra e tij dominoi frikshëm takimin.
