Manchester United ende nuk e ka gjetur sulmuesin që po kërkon, i cili do të udhëheq sulmin e tyre në sezonin e ri. Dëshira e madhe e Ruben Amorim ishte Viktor Gyokeres, por suedezi ka hedhur poshtë mundësinë për t’u transferuar te “Djajtë”, pasi preferon më shumë Arsenalin.
Një emër tjetër i njohur që u përfol është po ashtu Victor Osimhen, por edhe nigeriani duket larg “Djajve të Kuq”. Aktualisht, Manchester United ka në listë dy emra për të forcuar sulmin. I pari është anësori Bryan Mbeumo, për të cilin Brentford kërkon 78 milionë paundë dhe marrëveshja mes dy klubeve duket larg për momentin. Ndërsa emri i dytë, i cili ka fituar terren ditët e fundit është Ivan Toney.
Sulmuesi anglez 29-vjeçar, i cili aktualisht luan për Al-Ahli, ka tërhequr interesin e Man. United, pas një sezoni të shkëlqyer në Ligën Arabe, në të cilin shënoi 23 gola në 30 ndeshje. United beson se përvoja e tij e mëparshme në Premier League, instinkti i shënimit të golave dhe forca e tij fizike e bëjnë atë një opsion shumë të vlefshëm për të udhëhequr sulmin e tyre.
Al-Ahli e transferoi atë për 42 milionë euro nga Brentford, verën e kaluar, kur vlera e tij në treg ishte 50 milionë euro, por tani, sipas Transfermarkt, çmimi i tij ka rënë në 25 milionë euro. Në këtë kontekst, Manchester United ka vënë në dispozicion një ofertë shumë tërheqëse: 30 milionë euro në tavolinë plus 5 milionë euro bonuse.
Me këtë veprim, klubi anglez jo vetëm që kërkon të shmangë shpenzimet e tepërta, por edhe të sjellë një sulmues me përvojë, të etur për të garuar përsëri në nivelin elitar, dhe me një profil që i përshtatet stilit të lojës që ata duan të zbatojnë për sezonin e ardhshëm. Synimi madhor i Ivan Toney është të jetë pjesë e Anglisë për Kupën e Botës në verën e vitit 2026 dhe për këtë arsye është i hapur për një rikthim në Premier League, e aq më tepër tek një ekip si Manchester United.
The post Nuk ka në Europë si ai, Ruben Amorim gjen sulmuesin e ri në Arabinë Saudite appeared first on Telesport.
