Gjykata Themelore në Prishtinë ka caktuar masën e paraburgimit prej një muaji ndaj Millosh Antoviqit, i dyshuar për pjesëmarrje në protestat e dhunshme të 29 majit 2023 në Zveçan.
Vendimi është marrë më 16 prill 2025, pas aprovimit të kërkesës së paraqitur nga Prokuroria Speciale e Republikës së Kosovës (PSRK).
Lajmin e ka konfirmuar vetë Gjykata e Prishtinës.
Në protestën në fjalë, kishin mbetur të plagosur dhjetëra ushtarë të KFOR-it, përfshirë 93 të lënduar sipas të dhënave zyrtare.
Sipas Prokurorisë, Antoviq, 31 vjeç, u arrestua nën dyshimin për një sërë veprash penale, përfshirë:
Bashkimi për veprimtari kundërkushtetuese
Rrezikimi i personave nën mbrojtje ndërkombëtare
Pjesëmarrja në turmë që kryen vepër penale dhe huliganizëm
Sulm ndaj personit zyrtar
Shitblerje të narkotikëve
Armëmbajtje pa leje
Gjatë kontrollit në vendbanimin e të dyshuarit, autoritetet kanë sekuestruar sasi të konsiderueshme të substancave narkotike dhe pajisje të ndryshme.
Në mesin e provave të sekuestruara, sipas PSRK-së, përfshihen:
751 gram substancë e dyshuar narkotike
292 gram shpuzore me substancë narkotike
207 gram tabak metali me substanca narkotike
Peshore e vogël e dyshuar për matjen e lëndëve narkotike
Pushkë ajrore
12 aparate për prodhimin e kriptovalutave (Riga)
Telefon Samsung Galaxy S22 Ultra me IMEI përkatës
Në lidhje me protestat e 29 majit 2023, autoritetet kanë arrestuar edhe persona të tjerë.
Ndër ta është edhe Marko Daniq, i arrestuar në Mitrovicën e Veriut më 15 nëntor 2024.
Ai dyshohet për pjesëmarrje në të njëjtën protestë dhe për kryerjen e veprave penale kundër rendit kushtetues dhe sigurisë së Republikës së Kosovës.
Protestat kishin shpërthyer pas tensioneve në rritje mes përfaqësuesve të Listës Serbe dhe autoriteteve të Kosovës.
KFOR-i kishte ndërhyrë për të parandaluar eskalimin, ndërsa Lista Serbe kundërshtonte praninë e Policisë së Kosovës në veri.
Për këto ngjarje, deri më tani ka pasur të arrestuar, të akuzuar dhe disa të dënuar nga Gjykata e Prishtinës.
