Majore Luljeta Mehmeti-Quigley ka diplomuar me sukses nga Akademia Kombëtare e FBI-së, si pjesë e Sesionit të 296-të, në ceremoninë e mbajtur në Akademinë e FBI-së në Quantico, Virxhinia.
Sipas një njofitmi të Policisë së Kosovës, ajo është pjesë e një grupi të përzgjedhur të zyrtarëve të lartë të zbatimit të ligjit që përfundojnë këtë program prestigjioz dhe ndër të paktët në historinë e Policisë së Kosovës që kanë diplomuar nga Akademia Kombëtare e FBI-së.
Në nivel kombëtar dhe ndërkombëtar, më pak se një për qind e zyrtarëve të zbatimit të ligjit kanë mundësinë të ndjekin këtë trajnim elitar ekzekutiv.
Akademia Kombëtare e FBI-së ofron një program intensiv 11-javor me fokus në lidership, komunikim, shkenca të sjelljes, përgatitje fizike dhe praktika bashkëkohore të policimit. Pjesëmarrësit përzgjidhen mbi bazën e performancës së dëshmuar profesionale dhe potencialit udhëheqës, ndërsa mesatarisht kanë mbi 20 vjet përvojë në zbatimin e ligjit.
Sesioni i 296-të u përbë nga 254 zyrtarë që përfaqësonin 47 shtete të SHBA-së dhe Distriktin e Kolumbisë, si dhe zyrtarë nga 24 shtete të botës, katër organizata ushtarake dhe dy agjenci federale civile, duke theksuar karakterin e fuqishëm ndërkombëtar dhe ndërinstitucional të Akademisë.
Diplomimi i Majores Mehmeti-Quigley pasqyron profesionalizmin, lidershipin dhe përkushtimin e saj ndaj shërbimit në Policinë e Kosovës.
Ky sukses forcon kapacitetet institucionale të Policisë së Kosovës dhe përforcon angazhimin për standarde moderne, demokratike dhe të harmonizuara ndërkombëtarisht të policimit, duke kontribuar drejtpërdrejt në rritjen e sigurisë publike për të gjitha komunitetet në Kosovë.
