Në hapësirat e Stacionit Policor në Partesh është përuruar dhoma mike, donacion i KFOR-it Amerikan.
Në ceremoni morën pjesë Zëvendës Komandanti i Policisë së Kosovës, Remzi Azemi, Zëvendës Komandanti i KFOR-it, Nënkolonel Nicholas Acosta nga regjioni i Lindjes, si dhe përfaqësues nga shtabi i përgjithshëm i KFOR-it. Të pranishëm ishin edhe stafi i Drejtorisë Rajonale të Policisë në Gjilan, stacionit policor në Partesh si dhe Kryetari i Komunës së Parteshit.
Sipas njoftimit të Policisë dhoma mike është investuar nga misioni paqeruajtës KFOR, me qëllim krijimin e kushteve optimale për intervistimin e viktimave të dhunës në familje.
Me këtë rast, Nënkolonel Azemi falënderoi KFOR-in për mbështetjen dhe donacionin, ndërsa Nënkolonel Acosta vlerësoi bashkëpunimin me Policinë e Kosovës dhe shprehu gatishmëri për vazhdimin e mbështetjes në të ardhmen.
Ky investim është vlerësuar si mjaft i rëndësishëm për përmirësimin e kushteve dhe akomodimin e përkohshëm të viktimave të dhunës në familje, duke ofruar një ambient të sigurt, të rehatshëm dhe të denjë për rikuperimin e tyre.
Investimet përfshijnë renovimin e hapësirës, pajisjen me mobilie të reja, pajisje teknologjike të nevojshme, si dhe krijimin e një ambienti që ofron mbështetje psikologjike dhe emocionale për viktimat.
Institucionet e përfshira ri konfirmuan përkushtimin e tyre për të bashkëpunuar në luftën kundër dhunës në familje, duke ofruar mbështetje të vazhdueshme për viktimat dhe fuqizuar mekanizmat mbrojtës.
The post Në stacionin policor në Partesh përurohet dhoma mike donacion i KFOR-it appeared first on Kosovapost.net.
