Analisti politik boshnjak, Jasmin Mujanoviq, e sheh fundin politik të Milorad Dodikut të ngjashëm me atë të ish-kryeministrit të Maqedonisë së Veriut, Nikolla Gruevski – i cili pas dënimit me burgim për shpërdorim detyre ishte arratisur për në Hungari.
Pas vendimit të një gjykate në Bosnjë për Dodikun e cila e dënoi me një vit burgim dhe gjashtë vjet ndalim ushtrimi të detyrës si president i Republikës Sërpska, Mujanoviq pret që ai ta apelojë atë. Por, ai nuk pret që të ketë rezultat nga ai.
“Mendoj se shoku që vjen nga ky vendim në njëfarë forme e ka përgatitur terrenin për mosrrëzimin e vendimit. Por, çështja më e madhe është se çfarë do të bëjë Dodiku kur të dënohet përfundimisht me burgim. Mendoj se skenari më i mundshëm që njerëzit po e presin dhe për të janë përgatitur qe një kohë dhe u përmend edhe sot publikisht nga disa zyrtarë boshnjakë është se sikur Nikola Gruevski, ish-lideri i Maqedonisë së Veriut, Dodik me shumë gjasë do të largohet nga Bosnjë e Hercegovina, me siguri se do ta shikojë mundësinë për të ikur në Budapest e jo në Beograd. Është e mundshme që si përfundim të përfundojë në Moskë. Ky është vendimi i tij dhe nuk do të ishte domosdo gjë e keqe për Bosnjën – në të vërtetë mirë do ishte”, ka thënë ai në Interaktiv.
Mujanoviq ka theksuar se largimi i Dodikut nga jeta politike në Bosnjë është “një nga gjërat më pozitive që mund t’i ndodhë rajonit tonë”.
“Milorad Dodiku është një politikan ekstremist”, ka thënë ai.
Një vit burgim e për gjashtë vjet i është ndaluar ushtrimi i detyrës së presidentit të Republikës Sërpska të Bosnje dhe Hercegovinës, Milorad Dodik, të mërkurën. Po këtë ditë, disa orë pas shpalljes së vendimit nga një gjykatë, Dodik është takuar me presidentin e Serbisë, Aleksandër Vuçiq, në Banjallukë. Vendimin e gjykatës të dy e cilësuan si sulm “kundër Republikës Sërpska dhe popullit serb në tërësi”.
Megjithatë, sipas analistit politik boshnjak, Jasmin Mujanoviq, Vuçiqi veçse po e përgatit terrenin për largimin e Dodikut e zëvendësimin e tij të shpejtë. Ai në “Interaktiv” të KTV-së ka theksuar se Vuçiqi nuk e ka mundësinë ta vë në rrezik sigurinë e Serbisë “me manovra në rajon” duke u përpjekur që ta shpëtojë karrierën politike të Dodikut.
“Serbia është posaçërisht e rrezikshme dhe këtë njerëzit e Kosovës e dinë sigurisht bazuar në aktivitetet që i ka bërë vetëm në dyvjeçarin e fundit, veçanërisht sulmin paramilitar në Banjskë dhe disa nga operacionet e tjera që Serbia i ka realizuar në territorin e Republikës së Kosovës. Pra Serbia, ashiqare e ka kapacitetin për të përçuar kaos dhe jo-stabilitet. Megjithatë këto kohë pikëpamja ime është që Vuçiqi është në mënyrë shumë xhentile po e bën gati terrenin për largimin e Dodikut. Ai sigurisht se ka edhe lidhje shumë shumë të ngushta me partitë opozitare në entitetin e Republikës Serbe. Tashmë kanë nisur bisedat për atë se kush mund të jetë pasues i Dodikut – edhe brenda partisë së Dodikut, por ç’është më e rëndësishmja edhe jashtë partisë së tij. Emrat e pritshëm janë Drashko Stanivukoviq, kryetari i Banja Llukës, Jelena Triviç ka mundësi, lidere e njërës prej partive opozitare në entitet”, ka thënë ai në “Interaktiv”.
Mujanoviq është shprehur me siguri se në ditët dhe javët në vijim do të shihen veprime provokative nga serbët nacionalistë të Bosnjë e Hercegovinës. Por, ai ka theksuar se edhe ideja e Dodikut për ndarjen e RS-së nga Bosnja nuk mund të bëhet në të vërtetë realitet.
“Të gjithë e dinë këtë dhe të gjithë u përgatitën për këtë. E a e ka në të vërtetë regjimi në Banja Llukë të ndahet për Bosnjë e Hercegovina, jo nuk e ka. Edhe nëse parashikojmë se në një situatë shumë të rëndë krize do ta shihnim njëfarë fragmentimi të aparatit institucional të shtetit të Bosnjës shkaku i Marrëveshjes së Dejtonit – për shembull që ushtarët e etnisë serbe do të dilnin nga forcat e armatosura të Bosnjës edhe nëse futet kjo në llogari, entiteti i RS-së dhe regjimi i Dodokut, nuk kanë forcë apo resurse të mjaftueshme për tu ndarë suksesshëm nga Bosnjë e Hercegovina”.
