Sistemet janë transportuar në Karakas me avionë ushtarakë Il-76, sipas raportimeve.
Rusia i ka dërguar Venezuelës sisteme të avancuara të mbrojtjes ajrore Pantsir-S1 dhe Buk-M2E, sipas një ligjvënësi të lartë rus, në një lëvizje që vjen mes tensioneve të shtuara me Shtetet e Bashkuara në Karaibe.
Deputeti Aleksei Zhuravlev, zëvendës kryetar i Komisionit të Mbrojtjes në Dumën e Shtetit, tha për median zyrtare Gazeta.Ru se sistemet janë transportuar në Karakas me avionë ushtarakë Il-76, ndërsa Moska “nuk përjashton mundësinë” e dërgimit të raketave balistike apo lundruese në të ardhmen.
“Rusia është një nga partnerët më të rëndësishëm ushtarako-teknikë të Venezuelës”, deklaroi Zhuravlev. “Nga armët e vogla te avionët luftarakë, ne i kemi ofruar pothuajse të gjithë spektrin e pajisjeve. Avionët Su-30MK2 janë shtylla kurrizore e forcave ajrore venezueliane, ndërsa sistemet S-300VM (Antey-2500) kanë forcuar ndjeshëm mbrojtjen e saj nga sulmet ajrore”.
Pretendimet për dërgesat e fundit nuk janë verifikuar në mënyrë të pavarur, megjithatë faqet e ndjekjes së fluturimeve regjistruan një avion Il-76 rus që mbërriti në Karakas më 26 tetor, pas një rruge të ndërlikuar nga Naberezhnye Chelny në Rusi. Nuk dihet zyrtarisht çfarë ngarkese mbante.
