Profesori i ekonomisë, Shkumbin Misini, deklaron se taksa e ShBA-së ndaj Kosovës do të ndikojë automatikisht në zvogëlimin e të hyrave të bizneseve kosovare që kanë eksportuar atje.
Tarifa prej 10 për qind, sipas Misinit, do të ketë efekt zinxhir, pasi që siç thotë ai do të ketë rritje të taksës dhe rritje të çmimit të produkteve.
“Kosova ashtu-kështu që nga viti 2022 ka zvogëlim të eksportit për ShBA-në. Është një zvogëlim shumë i madh, dallimi mes 2023 dhe 2024 është një zvogëlim rreth 106 milionë euro që kemi pas eksport në ShBA ka rënë në 40 milionë. A do të ndikojë drejtpërdrejtë te shitja e produkteve të Kosovës në ShBA? Kjo do të ketë efekt zinxhiror, për shkak se nëse rritet çmimi i taksave prej 10 për qind, rritet çmimi i produktet rreth 10 për qind, dhe në mënyrë automatike ndikon në zvogëlimin e kërkesës të konsumatorëve për atë produkt. Në mënyrë automatike zvogëlon edhe të hyrat e bizneseve kosovare, të cilat kanë eksportuar në ShBA, që kryesisht kanë eksportuar tekstil, më shumë dyshekë dhe disa produkte të mobilierisë”, deklaroi ai në Tëvë1.
Ndërkohë, njohësi i ekonomisë tregon se taksa prej 10 për qind do ketë ndikim më së shumti te bizneset kosovare që kanë eksportuar tekstil.
“Efekti do të jetë anësor, përgjegjësinë duhet me kërkua se cilët faktorë kanë ndikuar që nga viti 2022 në 2024 kemi zvogëlim drastik të eksportit në ShBA, pa na vë taks fare Amerika? Një taks e tillë do të ndikojë drejtpërdrejtë te bizneset kosovare, sidomos të atyre që kanë qenë eksportues të tekstilit në ShBA”, tha ai.
Ndërkaq, lidhur me taksën presidentja e Kosovës, Vjosa Osmani i ka kërkuar Qeverisë në detyrë që të pezullojë të gjitha tarifat e importit për të gjitha produktet amerikane.
Presidenti i Shteteve të Bashkuara, Donald Trump, njoftoi të mërkurën se SHBA-ja do të vendosë një tarifë bazë prej 10 për qind për importet nga të gjitha vendet e botës, përfshirë nga Kosova dhe vendet e tjera të Ballkanit Perëndimor.
Ai njoftoi gjithashtu për dhe tarifa më të larta për dhjetëra vende që kanë suficit tregtar me Shtetet e Bashkuara, duke rritur rrezikun për një luftë tregtare dhe rritje të inflacionit.
Ndaj mallrave të importuara nga Kosova është vendosur tarifë prej 10 për qind, ndaj atyre nga Shqipëria 10 për qind, Serbia 37 për qind, Bosnia e Hercegovina 35 për qind, dhe Maqedonia e Veriut 33 për qind.
