Institucionet publike vazhdojnë të befasojnë me prioritetet e tyre financiare, duke shpërndarë fonde për luksin në vend të investimeve thelbësore për qytetarët. Kur nevojat për pajisje mjekësore, furnizime në spitale apo përmirësimin e shërbimeve shëndetësore mbeten të pazgjidhura, Ministria e Shëndetësisë ka gjetur kohë dhe buxhet për një tender aspak urgjent: furnizimin me disqe (fellne) për veturën e saj BMW, shkruan Demokracia.com.
Ministria e Shëndetësisë ka zhvilluar një tender për furnizimin me disqe (fellne) për veturën e tyre BMW.
Në këtë rast, Ministria nuk ka lënë asnjë detaj pa përmendur, përveç se kush do të përdorë fellnet.
Me një shumë prej 1,520.00 eurosh për 4 fellne, që është një shpenzim i kujdesshëm që reflekton përkushtimin e tyre të pandërprerë për shëndetin publik. Fituesi i tenderit, është kompania BP Engineering L.L.C., që pritet për të furnizuar këtë pajisje të rëndësishme.
Të gjitha këto, ndërkohë që nuk dihet se cili personalitet do të shijojë komoditetin e disqeve të reja të rrotullimit në BMW-në e tyre të re. /Demokracia.com/
