Kancelari gjerman, Friedrich Merz e ka quajtur “të papranueshëm” planin amerikan për të përdorur fondet ruse të ngrira në Bashkimin Evropian dhe ka hedhur poshtë një propozim për të shtuar 100 miliardë dollarë nga europianët.
Megjithatë, ai shprehu shpresë se do të arrihet përparim në Gjenevë, ndërsa fajësoi Rusinë për sulmet e fundit në infrastrukturën europiane.
“Kjo është e papranueshme”, tha kancelari në një intervistë me transmetuesin publik ARD, duke iu referuar një propozimi amerikan për të kanalizuar 100 miliardë dollarë asete ruse të sekuestruara në Evropë në përpjekjet e rindërtimit dhe investimeve në Ukrainë nën kontrollin e SHBA-së, të cilat më pas do të merrnin 50% të çdo fitimi të mundshëm.
Plani amerikan parashikon gjithashtu që BE të kontribuojë me 100 miliardë dollarë shtesë për rindërtimin e Ukrainës. Këto janë pjesë të planit që “sigurisht nuk mund të zbatohen pa miratimin tonë”, theksoi Merz, duke shtuar se diskutimet aktualisht janë përqendruar në përdorimin e aseteve si kredi.
“Nëse kjo kredi jepet, ajo do të sigurohet nga Bashkimi Europian dhe më pas do t’i jepet Ukrainës si kolateral në mënyrë që ajo të mund të vazhdojë të blejë armë. Por kjo nuk është diçka që i prek drejtpërdrejt amerikanët. Pra, sigurisht, amerikanët nuk mund të kenë qasje në këtë shumë”, tha ai, duke shtuar se “kërkesa për të shtuar edhe 100 miliardë nga Evropa nuk është diçka që mund ta pranojmë”.
Megjithatë, Friedrich Merz shprehu shpresën se në Gjenevë, ku po diskutohen edhe ndryshimet e paraqitura nga evropianët, do të arrihet përparim dhe pikat specifike të planit amerikan do të formulohen në një mënyrë të pranueshme për të gjithë. Ky është gjithashtu fokusi i propozimit që ai paraqiti, për të cilin ai nuk dha detaje të mëtejshme.
“Nuk mund dhe nuk dua të paragjykoj negociatat që po zhvillohen aktualisht në Gjenevë, por është e rëndësishme që të arrihet përparim tani”, tha ai.
Duke iu përgjigjur një pyetjeje se pse europianët nuk kanë më shumë peshë në këto negociata, Kancelari argumentoi se Evropa duhet ta kishte mbështetur Ukrainën shumë më herët dhe shumë më intensivisht. “Ne bëmë shumë pak, shumë vonë. Duhej të kishim bërë më shumë dhe më shpejt”, tha ai./Periskopi/
