Hansi Flick pati fjalë vlerësimi për Xabi Alonson, pas shkarkimit të tij si trajner i Real Madrid. Gjermani, që ruan një marrëdhënie të mirë profesionale me teknikun bask, shmangu gjykimin e vendimit të klubit madrilen, por theksoi vështirësinë e punës së trajnerit në futbollin e elitës.
“Te Real Madridi kanë vepruar kështu, por nuk është puna ime dhe nuk dua të flas për këtë, – tha Flick, përpara se të shpjegonte lidhjen me Alonso: – Kam një marrëdhënie shumë të mirë me Xabi, u njohëm në Leverkusen kur unë isha trajner i kombëtares dhe kemi qenë në kontakt”.
Flick nënvizoi se situata të tilla janë pjesë e natyrshme e futbollit profesionist: “Puna e trajnerit është shumë e ndërlikuar, ne kemi shumë përgjegjësi. Shkarkimi dhe largimi janë pjesë të profesionit tonë, ndaj duhet të jetojmë me këtë”.
Ai u shpreh i bindur për të ardhmen e Alonso: “Duhet t’i pranosh këto gjëra në futboll dhe i uroj më të mirën. Me siguri, së shpejti do të ketë një projekt të madh për të dhe stafin e tij”.
Flick e mbylli me mbështetje të qartë: “Futbolli është kështu, duhet të ecësh përpara dhe të dish ku të përmirësohesh, por Xabi është një trajner fantastik, ka të ardhme të madhe përpara”.
The post “Me siguri, së shpejti do të ketë një projekt të madh për Alonso dhe stafin e tij” appeared first on Telesport.
