Te Barça mbetën të shokuar nga njoftimi i rinovimit të Nico Williams me Athletic, një goditje që nuk e prisnin, pasi ishin të bindur se javën e ardhshme do të mund të mbyllnin marrëveshjen, nëse lojtari pranonte pagesën e klauzolës së lirimit.
Gjithçka ishte gati, por klubi katalanas e mori vesh vendimin e sotëm të lojtarit vetëm nga zyrtarizimi i rinovimit, megjithëse orët e fundit kishin filluar të ndjenin se diçka nuk po shkonte. Zemërimi i klubit blaugrana me lojtarin dhe rrethin e tij është i jashtëzakonshëm, pasi ndihen të përdorur dhe besojnë se ai nuk ka vepruar me sinqeritet në orët e fundit, duke i lënë në baltë pas 15 ditësh negociata intensive.
Ndjenja që mbizotëroi te Barça ishte ajo e mosbesimit, njësoj si vitin e kaluar kur Nico u paraqit me fanellën e re të Athletic, ndërkohë që në videokonferenca iu siguronte drejtuesve të Barçës se donte të firmoste për ta. Atëherë vendosi të qëndronte duke i zhgënjyer blaugranat, por këtë vit negociatat ishin shumë më të avancuara. Ishte arritur marrëveshja për pagën deri në vitin 2031 dhe po përgatitej pagesa e klauzolës së lirimit javën e ardhshme.
Te Barça besojnë se rrethi i Nico Williams nuk ka luajtur ndershëm dhe ka shfrytëzuar ofertën e Barçës për të arritur rinovimin e tij të madh me Athletic, me një rritje të konsiderueshme të pagës. Fakti që nuk paralajmëroi as për vendimin përfundimtar shihet si një manovër e fundit që i la blaugranat të papërgatitur, duke shkaktuar habi dhe zemërim, pas kontakteve të vazhdueshme të ditëve të fundit.
Operacioni nisi të ndërlikohej kur “SPORT” zbuloi takimin në Barcelonë më 13 qershor mes agjentit të lojtarit, Félix Tainta, dhe drejtorit sportiv të Barçës, Deco. Në atë takim, përfaqësuesi i lojtarit komunikoi gatishmërinë e Nico për të avancuar me transferimin dhe angazhimin se anësori dëshironte të vishte fanellën blaugrana pas zhgënjimit të vitit të kaluar.
Bërja publike e këtij takimi bëri që Athletic të ushtronte presion të madh mbi lojtarin dhe rrethin e tij, duke e ndërlikuar vendimin përfundimtar të Nico. Madje, klubi bask bëri ankesë zyrtare te La Liga dhe kërkoi kontroll financiar të llogarive të Barçës.
Qëndrimi i Nico Williams dukej aq i vendosur sa optimizmi te Barça u rrit. Aq më tepër kur ai dhe rrethi i tij pranuan kushtet financiare të kontratës. Çdo gjë dukej se ishte e mbyllur, por problemet nisën.
Rrethi i Nico, që madje kishte lënë të kuptohej se mund të kishte lehtësira në pagesën e klauzolës, filloi papritur të kërkonte garanci të forta për regjistrimin e lojtarit. Më pas, pranuan të riformulonin marrëveshjen me zgjidhje të pranueshme për Barçën, si mundësia e shitjes ose huazimit gjatë muajit gusht, nëse regjistrimi do të bëhej i vështirë.
Të gjitha këto përparime bënë që te Barça të besonin se këtë verë transferimi ishte i mundur, por përgjigjja përfundimtare e Nico vonohej. Pagesa e klauzolës u shty për javën e ardhshme për t’i dhënë më shumë kohë përfaqësuesit dhe lojtarit.
Derisa erdhi njoftimi i rinovimit të lojtarit me Athletic deri në vitin 2035, vendim që i la të habitur drejtuesit e Barçës. Që janë të indinjuar është pak të thuhet, por tashmë po punojnë me urgjencë për të vazhduar përforcimet e skuadrës.
The post Mashtrimi i dytë, që rëndon si poshtërim. Zemërim i madh te Barça ndaj Nico Williams appeared first on Telesport.
