Magji me topin, jo arrogancë: Spektakël i pastër në fushë, edhe arbitri “driblon” (video)

Kjo është shfaqje, jo provokim. Pamjet që po bëjnë namin në rrjetet sociale nuk vijnë nga një stadium europian, por nga zonat e Kasi Flava në Afrikën e Jugut, aty ku futbolli nuk është thjesht sport, por kulturë, art dhe krenari komunitare.

Kjo video “virale” tregon një ndeshje midis Mudagasi dhe Jukulyn, ku futbollistët, me numrin 10 dhe 9 në veçanti, shfaqin repertor magjik me topin, pa asnjë pengesë nga kundërshtarët, që i shikojnë me respekt dhe admirim.

Driblime të çmendura, finte artistike, pasime me thembër e gjoks… Dy minuta që duken si një film i edituar, por janë krejtësisht reale. Dhe më pas, si në një skenar të shkruar me kujdes: asist i gjatë perfekt dhe gol vendimtar në minutën e 90-të.

Në fakt, më i paparë është arbitri. Në kohën shtesë, ai kontrollon topin me gjoks, e zbut me klas, vallëzon për pak sekonda dhe pastaj mbyll ndeshjen. Spektakël mbi spektaklin.

Po çfarë është Kasi Flava? Një institucion kulturor në township-et e Afrikës së Jugut, aty ku futbolli nuk luhet për pikë, por për shpirtin e lojës. Kasi Flava përfaqëson një stil futbolli të lirë, artistik dhe emocional, që lindi në lagjet e izoluara gjatë apartheid-it, si mënyrë për të ruajtur identitetin dhe kreativitetin.

Ndeshjet janë amatore, por transmetohen “live” në TV. Për vendasit, si pjesë e shpirtit të përbashkët, çdo driblim është një deklaratë e tillë: “Ja kush jemi ne. Dhe shikoni sa bukur mund të luajmë”.

Në epokën ku gjithçka është efikasitet dhe taktika, Kasi Flava të kujton pse e dashurojmë futbollin në radhë të parë: për emocionin, artin dhe lidhjen me rrënjët.

The post Magji me topin, jo arrogancë: Spektakël i pastër në fushë, edhe arbitri “driblon” (video) appeared first on Telesport.