Edhe Luis Enrique foli për përballjen me ish-lojtarin e tij Mascherano: “Një trajner i madh, pa asnjë dyshim. Ishte mesfushor, më pas përfundoi duke luajtur si qendërmbrojtës, gjë që e kishte bërë edhe me Pep (Guardiola). Nëse do të më duhej të thoja dy lojtarë, për të cilët nuk kam pasur asnjë dyshim se do të bëheshin trajnerë të mirë, do të thoja Javier Mascherano dhe Sergio Busquets. Nuk kam asnjë dyshim se ‘Busi’ do të jetë një trajner i madh, nëse vetë do të dojë, sepse të dy ishin një zgjatim i trajnerit në fushë, si për pozicionin, ashtu edhe për aftësitë e tyre për të udhëhequr”.
Gabimi më i madh që mund të bëjë sot PSG është ta nënvlerësojë Inter Miami. Ky ka qenë paralajmërimi i Luis Enrique, trajnerit të kampionëve të Europës, që në konferencën për shtyp rikujtoi Messin, Suarezin e jo vetëm: “Nëse nuk ia heqim topin, gjërat nuk do të shkojnë mirë, sepse Busquets është gjithmonë i njëjti. Leo Messi është unik me topin në këmbë. Luis Suarez…, e keni parë golin e fundit që shënoi, çfarë aftësie për të menaxhuar situatën. Jordi Alba, që vjen nga pas, është gjithmonë i njëjti. Të gjithë e njohim atë pasim të Leos për Jordi në botën e futbollit”.
Për atë që e ka trajnuar te Barça (mes viteve 2014 dhe 2017), “La Pulga” mbetet gjithmonë një faktor: “Leo Messi është një model jo vetëm për të gjithë ne, që jemi ‘Culés’ (tifozë të Barcelonës) dhe e kemi shijuar për kaq vite te Barça, por edhe për të gjithë ata që e duan futbollin. Të gjithë ata që merren me futboll vazhdojnë të shohin te Leo Messi një shembull për t’u ndjekur. 10, 15 vite, nuk e di sa do të zgjasë ende ‘mbretërimi’ i Messit. Për mua, ai është pikë referimi si lojtari më i mirë në histori, pa asnjë dyshim. Pranoj opinione të tjera, por mbi të gjitha flet koha dhe vazhdimësia ndër vite, duke konkurruar gjithmonë në nivelin më të lartë, duke luajtur çdo tri ditë”.
Duke rikujtuar të kaluarën me fanellën blaugrana, “Lucho” tha: “Pata mundësinë të fitoja gjithçka si trajner te Barça. Jo vetëm i shijova ato tri vite, por edhe stërvitjet, besoj rreth 200 të tilla çdo sezon. E kam parë Leo Messin të bënte gjëra në stërvitje që i përkisnin një niveli tjetër, një realiteti tjetër, gjëra të pabesueshme. Ai ka aftësi dhe kontroll për t’i menaxhuar momentet e lojës, si askush tjetër. Vetëm kush ka ato cilësi mund t’i bëjë të duken të lehta. Ka qenë një kënaqësi e vërtetë, një përvojë emocionuese dhe besoj se të gjithë i ruajmë si kujtime shumë të bukura”.
The post Luis Enrique “kurorëzon” Messin: Më i miri në histori, bën gjëra që i përkasin një realiteti tjetër appeared first on Telesport.
