Zyrtarët e Bashkimit Evropian kanë njoftuar se nuk do të zhvillojnë takime brenda ndërtesës së Qeverisë së Kosovës derisa vendi të ketë një ekzekutiv me mandat të plotë.
Përmes një letre dërguar Kurtit më 8 gusht, ambasadori i Bashkimit Evropian në Kosovë, Aivo Orav, e ka informuar atë se deri te ky vendim kanë ardhur pas “aktgjykimit të Gjykatës Supreme të Kosovës të 25 qershorit” dhe BE-ja “ka përshtatur praktikat e saj të angazhimit në përputhje me këtë vendim pas konsultimeve me shtetet anëtare”.
E në lidhje me këtë temë, në një prononcim për “Bota sot” foli njohësi i marëdhënieve diplomatike, Amir Shabani.
Së pari, ai komentoi vendimin e Supremes të cilin BE e përdorën si shkak për t’ia dërguar letrën Kurtit dhe për t’i ndërprerër takimet brenda ndërtesës së qeverisë.
“Pas vendimit të Gjykatës Supreme që vendosi se Hekuran Murati, në shkelje të ligjit, mban dy poste, atë të Ministrit të Financave dhe atë të deputetit në Kuvendin e Kosovës, zyra e BE-së në Kosovë ka njoftuar Qeverinë e Kosovës se zyrtarët e lartë të BE-së dhe të shteteve anëtare nuk do të zhvillojnë takime brenda ndërtesës së Qeverisë së Kosovës me Kryeministrin në detyrë, Albin Kurti.
Përveç Kurtit, këta zyrtarë të lartë nuk do të takohen as me ministrat në detyrë brenda ndërtesës së Qeverisë derisa të formohet një qeveri e re me mandat të plotë”, shpjegoi njohësi.
Krahas kësaj, Shabani potencoi se ky qëndrim i BE-së erdhi si pasojë e bllokadës ë gjatë të Kuvendit, ndonëse tha se ky standard nuk është parë më parë ndaj shteteve tjera.
Në këtë pikë, ai kishte edhe një thirrje për kryeministrin në detyrë të Kosovës.
“Ky është qëndrimi i politikës së jashtme të BE-së në raport me qeverinë në detyrë të Albin Kurtit, kjo pasi që një periudhë të gjatë kohore konstituimi i Kuvendit të Republikës së Kosovës ka qenë i bllokuar dhe jofunksional.
Një standard i tillë i BE-së duket të jetë i ri, sepse edhe kriza politike e tillë në Kosovë duket e re, andaj vendimet merren konform gjendjes aktuale. Kryeministri në detyrë, Albin Kurti duhet t’i përforcojë sa më shumë marrëdhëniet me BE-në në mënyrë të forcimit të shtetit të së drejtës, funksionimit institucional dhe demokratik”, përmbylli Amir Shabani.
The post Letra e BE-së për Kurtin që ndezi debat, zbërthehen prapaskenat e saj! appeared first on Kosovapost.net.
