Lady Gaga ka treguar edhe një herë se është ikonë e padiskutueshme e stilit dhe muzikës pop, teksa u shfaq në një paraqitje mjaft joshëse në New York, të enjten.
Këngëtarja e hitit “Poker Face”, 39 vjeç, zgjodhi një veshje tërësisht të zezë që përfshinte pantallona të ngushta, një bluzë elegante dhe një xhaketë të madhe e moderne.
Pamjen e kompletoi me syze të mëdha dielli dhe buzëkuq të kuq, të cilët krijuan kontrast perfekt me flokët e saj biondë, shkruan DailyMail.
Në sy bien edhe këpucët e saj të larta me platformë, të ngjashme me ato që ajo veshi në klipin e famshëm “Bad Romance” në vitin 2009.
Gjithashtu, fansat vunë re unazën e saj të fejesës, një diamant prej tetë karatësh i punuar nga Sofia Jewelry, me vlerë të vlerësuar rreth 578 mijë dollarë (493 mijë euro).
Gaga ka rrëfyer më herët se i fejuari i saj, sipërmarrësi 46-vjeçar Michael Polansky, fillimisht i kishte propozuar me një fije bari – moment që më vonë u kthye në frymëzim për një këngë të saj.
Paraqitja e artistes vjen menjëherë pas publikimit të trailerit të ri të pjesës së dytë të sezonit të dytë të serialit të suksesshëm të Netflix, Wednesday. Zëri i saj dëgjohet në fund të videos duke i lënë një paralajmërim të ftohtë personazhit kryesor, Wednesday Addams (Jenna Ortega, 22 vjeç): “Kujdes – çdo gjë ka një çmim”.
Netflix ka zbuluar se Gaga do të luajë rolin e Rosaline Rotwood, një mësuese legjendare e Nevermore, e cila do të ndërthuret me historinë e Wednesday. Pjesa e dytë e sezonit do të publikohet më 3 shtator.
Roli i saj u konfirmua zyrtarisht në maj, gjatë eventit Tudum 2025, ku Gaga ndezi skenën e Kia Forum me një performancë tetë minutëshe që përfshinte hitet e saj më të njohura dhe këngën e fundit Abracadabra.
Duke dalë nga një arkivol i dekoruar me mbishkrimin “Këtu prehet Mbretëresha Nënë”, Gaga u shfaq e rrethuar nga balerinë të frymëzuar nga familja Addams dhe riktheu madje kërcimin viral të sezonit të parë, që u bë i famshëm kur u kombinua me këngën e saj Bloody Mary. Në një moment kulmor, ajo mirëpriti vetë Jenna Ortega në skenë, duke e çuar publikun në entuziazëm total.
Netflix e priti zyrtarisht me fjalët: “Mirë se erdhe në Nevermore, Mother Monster”.
