Kuvendi i Komunës së Vushtrrisë sot ka mbajtur mbledhjen e radhës, ku janë shqyrtuar disa pika të rendit të ditës, mirëpo ajo më e rëndësishmja ishte themelimi i Komitetit për Politikë dhe Financa (KPF).
Para fillimit të seancës, Kryesuesi i Kuvendit, Nasuf Aliu së bashku me Kryetarin e Komunës, Xhafer Tahirin kanë mbajtur një takim me të gjitha subjektet politike, ku është diskutuar për çelësin e përbërjes së KPF-së. Kryesuesi i ka njoftuar për çelësin, i cili do të propozohet. Mirëpo, sipas burimeve brenda takimit, PDK-ja e ka kundërshtuar këtë çelës dhe ka kërkuar që t’i ketë 3 anëtarë në KPF, e jo 2 anëtarë.
Kryesuesi i Kuvendit, Nasuf Aliu në seancë të kuvendit e propozoi këtë çelës (formulë) lidhur me përbërjen e KPF-së :
Kryesuesi i kuvendit me automatizëm (sipas legjislacionit në fuqi), PDK- 2 anëtarë, VV-2 anëtarë, LDK- 2 anëtarë, AAK- 1 anëtar dhe LB- 1 anëtar. PDK-ja në fillim e kundërshtoi këtë çelës, mirëpo më vonë u pajtua me këtë. Ndërkaq, Nezir Klinaku, nga Lëvizja për Bashkim (LB) deklaroi se: “Ligji për Vetëqeverisje Lokale dhe Udhëzimi Administrativ për Procedurën e Themelimit, Përbërjen dhe Kompetencat e Komiteteve të Përhershme në Komunë parasheh përfaqësim të entiteteve politike.
Kuvendi i Komunës së Vushtrrisë njëzëri votoi themelimin e Komitetit për Politikë dhe Financa me këtë përbërje:
- Nasuf Aliu -kryesues i kuvendit
- Shpëtim Zhegrova- PDK
- Melihate Basholli Latifi -PDK
- Ymer Haradinaj – VV
- Fjolla Ujkani- VV
- Shkëlzen Feka- LDK
- Rrezarta Krasniqi- LDK
- Lutfi Bilalli- AAK dhe
- Nezir Klinaku – LB.
Çështjet tjera që u shqyrtuan ishin edhe Draft-plani i punës së kuvendit, draft-plani i punës së kryetarit të komunës, plani i veprimit mbi rekomandimet e auditorit të përgjithshëm, formimi i komisionit për ndarjen e bursave për studentë dhe shpërblime për nxënës, propozim-vendimi për shndërrimin e tokës bujqësore në tokë ndërtimore si dhe themelimi i grupit joformal të grave, të cilat njëzëri u votuan.
Po ashtu, në këtë mbledhje u betuan edhe anëtarët e rinj të kuvendit komunal: Kushtrim Hyseni (PDK), Faton Shabani (VV),Agim Bregaj (LDK) dhe Basri Menxhiqi (AAK).
