Sot nga ora 10:00 sipas ftesës nga Prokuroria Speciale e Kosovës, kryeministri i vendit Albin Kurti, do duhej të paraqitej për intervistim, si dëshmitar në rastin e rezervave shtetërore.
Gjykata Themelore e Prishtinës, para disa ditësh ka lëshuar edhe urdhër për ta përfunduar këtë detyrë ligjore, transmeton Klankosova.tv.
Por, duket se as kësaj here Kurti s’e ka nijet të paraqitet në zyrat e Prokurorisë Speciale siç i kërkohet.
Ai bashkë edhe me ministren e Arsimit, Shkencës, Teknologjisë dhe Inovacionit, Arbërie Nagavci, sipas agjendës, do të marrin pjesë në vendosjen e një gurthemeli të një çerdheje të re në Gjilan dhe kjo ndodhë pikërisht në kohën e njëjtë kur Gjykata e urdhëroi të intervistohet në Prokurorinë Speciale.
Kështu thotë të paktën një ftesë për media e dërguar nga MASHT-i.
Mbetet të shihet nëse kreu i ekzekutivit do t’i përgjigjet kësaj radhe urdhrit të Gjykatës për intervistim, anise ftesa e MASHT-it, mes rreshtash konfirmon pjesëmarrjen e tij në ngjarjen në Gjilan, kjo pasi në tri rastet e para ai ka refuzuar që të jap dëshmi, pavarësisht thirrjeve.
