Është vet politika, ajo që me shembullin e saj për paaftësi të krijojë institucionet e dala nga zgjedhjet e 9 shkurtit, madje duke dështuar hiç më pak se 11 herë për konstituimin e Kuvendit, t’ua lërë bizneseve në duart e tyre çrregullimin e çmimeve.
Qytetarët mbase, janë kategoria më e dëmtuar në këtë lojë, të cilën deshën apo jo, duhet ta përballojnë me shumë vështirësi, marrë parasysh pagat e tyre të ulëta.
Publikimi i fundit i Agjencisë së Statistikave të Kosovës i muajit mars, nxjerr në pah një rritje mesatare të çmimit të produkteve të konsumit për 2.9% krahasuar me periudhën e njëjtë të vitit të kaluar.
“Indeksi i tërësishëm i harmonizuar i çmimeve të konsumit është më i lartë në një mesatare prej 2,9 % në muajin Mars 2025, krahasuar me muajin Mars të vitit të kaluar. Kjo kryesisht është shpjeguar me rritjen e çmimeve të konsumit siç janë kafeja, çaji dhe kakao për 17,1%, perimet për 8,7%, mishi 8,3%, qumështi, djathi dhe vezët për 7,1%, pemët për 6,7% si dhe buka e drithërat për 2,1%”, grafika e Agjencisë së Statistikave të Kosovës.
Përveç mungesës së institucioneve, sipas ekonomistit Lulzim Beqiri, edhe vendimi i fundit i Zyrës së Rregullatorit për Energji, për ndryshimin e tarifave në një ngritje prej 16.1%, i ka hapur rrugë ngritjes së çmimeve të produkteve bazë.
“…sigurisht që me rritjen e çmimit të rrymës dhe mos formimin e institucioneve bizneset kanë filluar të rrisin çmimet. Një ngritje veç sipas perceptimit të tyre. Buka, produktet esenciale veçse kanë filluar të rriten, por edhe gjërat e luksit…”, tha Beqiri për RTV21.
Ditëve të fundit rritja e çmimit të rrymës nga ZRrE-ja ngjalli reagime të shumta, përfshirë tri protesta si dhe padinë e shoqërisë civile të deponuar ndaj ZRRE-së në Gjykatën Themelore në Prishtinë.
