Komuna e Pejës pritet që t’u vë një taksë prej një euro, qytetarëve që dëshirojnë ta vizitojnë Rugovën.
Lidhur me këtë çështje mediumi “Reporteri”, ka kontaktuar kryetarin e Pejës, Gazmend Muhaxheri, i cili e ka konfirmuar se janë duke e shqyrtuar këtë propozim.
“Ajo është kompetencë e Drejtorisë për Zhvillim Ekonomik, e cila e ka ba një propozim që në të ardhmen për me mujt mi regjistru turistët që flejnë në villa në Rugovë, e që do të shërbente për mirëmbajtjen e gjelbërimit e pastërtisë në Bjeshkët e Rugovës,”, ka thënë ai.
Por, ish drejtori i Financave në Komunën e Pejës, Jeton Abazaj thotë se kjo taksë mund të ndikojë negativisht, meqë do të ndikonte që turistët të mos shkonin në Pejë.
“Një gjë negative që më ka ra në sy tani është se Komuna ka fillu një rregullore për vendosjen e një takse për turista. Komuna po pretendon dhe po krenohet që ka me i detyru turistat me pagu taksë 1 ose 2 euro. Për mendimin tim kjo ka me ndiku akoma më tepër që njerëzit mos me ardhë në Pejë.”, tha ai.
