Vinçat shkarkojnë ngadalë kutitë metalike të mbushura me gjithçka, nga lëndët e para te ushqimi dhe elektronika, dhe, në disa raste, edhe kokaina.
Pas sekuestrimit në Hamburg të 16 tonëve, prokurori i shtetit akuzohet se është në listën e pagave të bandës që supozohej se po ndiqte penalisht.
Në diellin pranveror të Hamburgut, 200 mijë anije mallrash me peshë gati gjysmë milje, të grumbulluara lart me të njëjtën peshë në kontejnerë transporti, janë ankoruar përgjatë lumit Elba.
Vinçat shkarkojnë ngadalë kutitë metalike të mbushura me gjithçka, nga lëndët e para te ushqimi dhe elektronika, dhe, në disa raste, edhe kokaina.
Midis viteve 2018 dhe 2023, sekuestrimet e kokainës u rritën me 750%, duke e dalluar Gjermaninë si një tjetër qendër të madhe evropiane në tregtinë globale në zgjerim e sipër.
Por fluksi nuk po rrit vetëm varësinë, por po nxit edhe korrupsionin në një vend që perceptohet si një nga më pak të korruptuarit në botë.
“Po shohim një infiltrim në infrastrukturën portuale në Hamburg, ryshfet ndaj oficerëve të policisë në këmbim të informacionit dhe së fundmi një prokuror shteti që pret gjyqin për rrjedhje informacioni në një rrjet trafikimi kokaine”, tha Daniel Brombacher, i cili drejton byronë e Evropës në Iniciativën Globale Kundër Krimit të Organizuar Transnacional.
Në vitin 2021, Policia njoftoi sekuestrimin më të madh të kokainës në Evropë në port: 16 ton pluhur me pastërti të lartë të fshehur në 1 mijë e 700 kuti stukoje muri të dërguara nga Paraguai në Hamburg.
Prokurori publik kryesor në atë rast ishte në gjykatë javën e kaluar i akuzuar se ishte në listën e pagave të së njëjtës bandë që supozohej se po ndiqte penalisht.
Burri, i quajtur Yashar G, akuzohet për rrjedhjen e detajeve të hetimit te banda dhe për paralajmërimin e të dyshuarve për arrestimin e tyre të afërt në këmbim të 5 mijë eurove në muaj.
Ai u arrestua në tetor nga Policia që monitoronte komunikimet e koduara të bandës – kur Policia bastisi rrjetin menjëherë pas sekuestrimit në Hamburg, objektivat kryesorë tashmë kishin ikur në Dubai.
Yashar G akuzohet gjithashtu për rrjedhjen e informacionit të ndjeshëm te bandat e tjera të drogës. Ai i mohon të gjitha akuzat kundër tij.
Prodhimi i kokainës në Kolumbi dhe konsumi i saj në Evropën Perëndimore po arrijnë nivele rekord.
Po ashtu edhe paratë që fitojnë rrjetet evropiane të krimit të organizuar duke shpërndarë një produkt me vlerë më të madhe se platini në peshë.
Një kilogram kokainë vlen 2 mijë dollarë në Kolumbi, por sapo arrin në Evropë, vlera e saj rritet mesatarisht në 40 mijë dollarë.
Fitimet nga kjo rritje e madhe nuk shpenzohen vetëm për makina dhe vila luksoze, por përdoren për të lehtësuar rrugën për dërgesën e ardhshme, ndërsa gangsterët ngulin tentakulat e tyre në vende duke përfshirë Holandën, Belgjikën, Suedinë dhe Gjermaninë.
Hamburgu, porti i tretë më i madh i Bashkimit Evropian, është një nga portet më të synuara nga bandat e drogës, sipas Europol-it.
Persona të brendshëm të njohur si hafeninnentäter (duke përfshirë punonjësit e portit dhe të anijeve, rojet e sigurisë dhe shoferët e kamionëve) e lëvizin drogën pa u vënë re.
Dy punonjës të portit të Hamburgut u burgosën këtë muaj për ndihmë në transportimin e 480 kg kokainë nga Ekuadori dhe për mundësimin e një sulmi fizik ndaj një kolegu që kërcënoi komplotin.
Policia ka nisur një fushatë publicitare për të ndihmuar punonjësit e portit të mbrohen nga bandat e drogës që përpiqen t’i rekrutojnë ose t’i zhvatin, por forcat e sigurisë portuale të Hamburgut ndihen aq të kërcënuara sa vitin e kaluar kërkuan mitralozë.
Në një incident, policia belge i dha informacion Policisë portuale të Hamburgut se një bandë e armatosur franceze e drogës po planifikonte një bastisje për të rikuperuar kokainën e sekuestruar.
Ndërkohë, fitimet e kokainës derdhen në rrugët e Hamburgut.
Një sërë rastesh në Gjermani kanë nxjerrë në pah gjithashtu korrupsionin e dyshuar brenda radhëve të Policisë: një oficer në shtetin jugperëndimor të Baden-Württemberg u arrestua këtë muaj me dyshimin se ishte në listën e pagave të mafias italiane ‘Ndrangheta’, një oficer i lartë Policie në Hanover i dyshuar për marrje ryshfeti nga një rrjet trafikimi droge i arrestuar në janar, një oficer i skuadrës së drogës u arrestua pranë Frankfurtit në nëntor me akuzat për “ndihmë dhe inkurajim” të tregtarëve të drogës dhe një oficer policie i arrestuar në Bon në gusht i cili u akuzua për dhënien e informacionit të klasifikuar anëtarëve të mafias holandezo-marokene, lojtarë të mëdhenj në tregtinë e drogës në Evropë.
Autoriteti Portual i Hamburgut tha se çështjet e lidhura me sigurinë portuale u trajtuan nga Policia e Hamburgut.
Në një deklaratë, një zëdhënës i policisë tha se “grupet ndërkombëtare të krimit të organizuar shpesh rekrutojnë punonjës të industrisë portuale për të mbështetur kontrabandën e kokainës nga Amerika e Jugut në Gjermani dhe Evropë nëpërmjet portit të Hamburgut”.
“Këta të ashtuquajtur ‘shkelës të brendshëm të portit’ po luajnë një rol të veçantë kyç në këtë lloj importimi të paligjshëm të drogës”.
Zëdhënësi tha se Policia, së bashku me doganat, autoritetin portual dhe sektorin privat, po “bëjnë përpjekje të konsiderueshme për të luftuar këtë çështje”.
Ekspertët e krimit të organizuar kanë paralajmëruar se natyra e vërtetë e korrupsionit të sjellë nga rrjetet e trafikimit të drogës mbetet e fshehur.
Gjaku i jetës së krimit të organizuar është kokaina.
Por autoritetet po mposhten pa shpresë.
Pavarësisht gjithë punës së bërë nga forcat e rendit në shënjestrimin e tregtisë së kokainës në Evropë, furnizimi është i bollshëm dhe, ndryshe nga shumica e produkteve, kushton pothuajse njësoj si 10 vjet më parë.
Kur holandezët shpenzuan 524 milionë euro për të rritur sigurinë në port në përgjigje të një vale ekzekutimesh nga bandat e lidhura me tregtinë e kokainës, bandat thjesht kaluan në porte në Francë, Spanjë, Portugali, Skandinavi dhe vendet baltike.
Sekuestrimi i kokainës në Hamburg ra në vitin 2024, por droga ende po arrin me bollëk: në anije të vogla në portet më të vogla të Gjermanisë veriore ose nëpërmjet “kontrabandës së parazitëve”, ku kokaina ngjitet në pjesën e jashtme të trupave të anijeve të mallrave dhe rikuperohet nga zhytësit në portin e destinacionit.
Por kapja e vetë gangsterëve nuk është e mjaftueshme, paralajmërojnë kriminologët, dhe kërkimi për korrupsion duhet të shkojë më thellë.
Marrë nga “The Guardian”, përshtatur për “Albanian Post”.
