Nëse planifikoni të udhëtoni nga Aeroporti i Cyrihut në ditët para Krishtlindjeve, përgatituni për radhë të gjata dhe të ngadalta.
Sezoni i festave është zakonisht kaotik në aeroporte, pasi vëllimi i pasagjerëve rritet gjatë kësaj periudhe. Por këtë vit situata është edhe më e keqe në aeroportin më të madh ndërkombëtar të Zvicrës.
Për momentin, 24 skanerë të rinj CT po instalohen në Cyrih, duke shkaktuar pritje të gjata në pikat e kontrollit të sigurisë, veçanërisht gjatë orëve të pikut të udhëtimit.
Sipas menaxhmentit të aeroportit, 30 përqind e kapacitetit të kontrollit aktualisht nuk është i disponueshëm, që do të thotë se pasagjerët janë të mbingarkuar në më pak pika kontrolli, shkruan thelocal.
Prandaj, për të shmangur humbjen e fluturimeve të tyre, pasagjerëve u kërkohet të paraqiten 1.5 deri në 2 orë më herët për fluturimet Shengen, dhe deri në 2 deri në 3 orë më herët për destinacionet jashtë Shengenit, përcjell albinfo.ch.
Nuk është caktuar asnjë datë për përfundimin e punimeve, por ndoshta nuk do të jetë para mesit të dhjetorit, sipas menaxhmentit.
Çfarë janë këta skanerë CT në të vërtetë?
Edhe pse instalimi i tyre zgjat radhët dhe kohën e pritjes, në fund të fundit, këto pajisje do t’u kursejnë kohë udhëtarëve, duke rritur edhe sigurinë e tyre.
Falë kësaj teknologjie, bagazhet mund të modelohen në 3D.
Ekipet e sigurisë do të jenë në gjendje të shqyrtojnë të gjitha çantat shtresë pas shtrese, dhe prania e eksplozivëve mund të zbulohet shumë më lehtë.
