Gjykata Themelore në Prishtinë ka aprovuar kërkesën për hudhjen e aktakuzës ndaj Faton Klinakut, duke pushuar procedurën penale ndaj tij për veprën penale “Kanosja” ndaj kryeministrit Albin Kurti. Procedura penale do të vazhdojë vetëm ndaj të akuzuarit tjetër, Nuredin Selmani.
Në një deklaratë për IndeksOnline, Klinaku ka thënë se vendimi ishte i pritshëm dhe ka shprehur bindjen se nuk kishte kryer vepër penale.
“Po vendimi është marrë ditën e djeshme (e enjte), por nuk është publikuar për shkak të fushatës. Vendimi ka qenë i pritshëm, për këtë jam ankuar dhe gjykata ka vendosur drejt, dhe ka konstatuar se nuk ka kurrfarë vepre penale. Faktikisht, edhe kur u ngrit aktakuza, unë e kam thënë se vepër penale nuk ka pasur. Për këtë arsye kemi ndjekur procedurat penale dhe kemi ushtruar të drejtën e ankesës përmes avokatit tonë,” ka deklaruar ai.
Klinaku ishte akuzuar se më 29 gusht 2023 kishte kërcënuar kryeministrin Kurti përmes rrjetit social Facebook, duke shkruar se më parë do ta vriste Kurti sesa ta lejonte të largohej nga Kosova. Sipas aktakuzës, ai kishte përsëritur kërcënimin edhe më 30 gusht 2023.
Ndërkohë, procedura penale vazhdon për Nuredin Selmanin, i cili akuzohet për veprime të ngjashme kërcënuese ndaj kryeministrit Kurti, duke përfshirë postime në rrjetet sociale dhe deklarata në emisione televizive, si dhe posedim të armëve të gjata luftarake.
