Një nga emrat më të përfolur për korrupsion në nivele të larta në Shqipëri është ish-ministri Ilir Beqaj. Ai është dërguar disa herë në gjykatë nga SPAK (Struktura e Posaçme Kundër Korrupsionit dhe Krimit të Organizuar), madje edhe me duar të lidhura. Mbi të rëndojnë akuza të shumta për abuzim me fondet publike dhe korrupsionin. Madje, gjatë ditës së djeshme, ai është marrë në pyetje dhe është dërguar sërish në gjykatë nën dyshimet për shpërdorim të fondeve të Bashkimit Evropian, shkruan Demokracia.com.
Demokracia.com ka zbuluar se një kompani farmaceutike, e cila është përfolur për lidhjet e saj me Beqajn, po fiton tenderë në Kosovë. Bëhet fjalë për kompaninë “DELTAPHARMA”, e cila është e regjistruar në Shqipëri, por operon edhe në Kosovë përmes degës së saj.
Kompania farmaceutike “DELTAPHARMA” nga Shqipëria ka hapur degën e saj në Kosovë që në vitin 2013. Kjo kompani ka fituar disa tenderë në sektorin shëndetësor të Kosovës, sidomos në nivelin qendror. Kohëve të fundit, ajo ka arritur të sigurojë disa kontrata të rëndësishme, disa prej të cilave do të finalizohen nesër me nënshkrimin e marrëveshjeve.
Në tenderin për “Furnizim me barna nga Lista Esenciale për nevojat e SHSKUK-së”, “DELTAPHARMA-KS” ka dalë fituese në dy lote.
- Lot 1: Omalizumab – 108,874.80 euro
- Lot 2: Secukinumab – 817,430.13 euro
Kontrata ka një kohëzgjatje prej 12 muajsh dhe pritet të nënshkruhet nesër.
Përveç kësaj, “DELTAPHARMA-KS” ka fituar edhe një tjetër tender të organizuar nga SHSKUK për furnizimin me barna nga Lista Esenciale. Në këtë rast, ajo ka fituar Lotin III, që përfshin injeksionin intravitreal 120 mg, me një vlerë kontrate prej 296,994.60 euro që do të nënshkruhet nesër.
Ndërkohë, vetëm disa ditë më parë, kjo kompani ka fituar edhe një tjetër kontratë me vlerë 49,990.50 euro.
Kush fshihet pas “DELTAPHARMA”?
Sipas të dhënave të Agjencisë së Regjistrimit të Bizneseve në Kosovë (ARBK), pronar i 100% të aksioneve të “DELTAPHARMA-KS” është kompania “DELTA PHARMA AL”, e regjistruar në Shqipëri. Menaxher i saj figuron Eduard Curraj.
Në Shqipëri, “DELTA PHARMA AL” është nën pronësinë e “DELTA HOLDING”, një kompani në të cilën Eduard Curraj zotëron 50% të aksioneve, ndërsa pjesa tjetër prej 50% i takon Dorian Sadikut.
Lidhjet me Ilir Beqajn
Mediat në Shqipëri kanë raportuar vazhdimisht për lidhjet mes Eduard Curraj dhe ish-ministrit Ilir Beqaj. Madje, në fund të vitit 2024, Curraj u thirr nga SPAK për të dhënë dëshmi në lidhje me disa nga akuzat që rëndojnë mbi Beqajn.
Sipas raportimeve të mediave shqiptare, në dosjen hetimore të përgatitur nga SPAK për ish-ministrin e Shëndetësisë, Ilir Beqaj, zyrtarë të SPAK (Agjencia Shtetërore e Programit Strategjik dhe Koordinimit të Ndihmës) dhe biznesmenë të ndryshëm, ekzistojnë prova të forta që lidhin Beqajn me Eduard Curraj dhe Dorian Sadikun.
Gjithashtu, Byroja Kombëtare e Hetimit ka kryer një kontroll të detajuar në ambientet e kompanisë “Delta Pharma” të Eduard Curraj dhe më pas edhe në banesat e aksionarëve dhe drejtuesve të saj.
Gruaja e Beqajt dhe lidhjet me “Delta Pharma”
Një detaj i rëndësishëm që ka dalë nga hetimet është fakti se gruaja e Ilir Beqajt, Adriana Beqaj, ka qenë aksionere në një kompani të lidhur me “Delta Pharma”, raporton Demokracia.com.
Dokumentet e Qendrës Kombëtare të Biznesit (QKB) dhe të dhënat nga Open Data Albania tregojnë se “Albanian Food and Hospitality Lab”, një kompani e themeluar më 23 janar 2019, kishte si ortakë fillestarë Arti Malaj dhe Adriana Beqaj, secili me nga 50% të aksioneve.
Por, një muaj më vonë, më 26 shkurt 2019, Adriana Beqaj dhuroi 35% të aksioneve të saj për Arti Malajn, duke mbetur me vetëm 15% të kapitalit. Më pas, më 3 mars 2020, ajo u largua plotësisht nga kompania, ndërsa pronar i saj u bë Eduard Curraj, i cili, siç dihet, është pronar i 50% të aksioneve të “Delta Holding”.
Ish ministri Beqaj është dërguar dje në gjykatë për një akuzë tjetër të madhe që rëndon mbi të. /Demokracia.com/
