Kërkimet për gjetjen e viktimave të aksidentit ajror në Washington pritet të zgjasin me ditë, angazhohen edhe agjentët e FBI

Shefi i Zjarrfikësve të Washingtonit tha se të gjitha përpjekjet e kërkim-shpëtimit po zhvillohen në ujë dhe se ato do të zgjasin disa ditë, pas aksidentit në ajër ndërmjet një aeroplani pasagjerësh me 64 persona dhe një helikopteri ushtarak me 3 ushtarë në të.

John A. Donnelly Sr. tha se të gjitha përpjekjet e kërkim-shpëtimit që po zhvillohen tani janë në ujë dhe se kushtet janë “të rrezikshme”, raporton CNN.

“Sfidat janë aksesi. Uji në të cilin po operojmë është rreth 8 metra i thellë, ka erë, ka copa akulli, kështu që është thjesht e rrezikshme dhe e vështirë për të punuar”, tha Donnelly. “Uji është i errët, është i turbullt dhe kjo është një gjendje shumë e vështirë për ta për t’u zhytur”.

Ai shtoi se përpjekjet do të zgjasin disa ditë.

“Nëse mund ta imagjinoni, lumi është një njollë e madhe e zezë gjatë natës pa drita në të”, tha ai.

Donnelly tha se pret që hetimi për përplasjen të zgjasë më shumë.

Ekipi i zhytjes i zyrës së FBI në Washington po ndihmon në përpjekjet për t’i gjetur viktimat e përplasjes së avionit me helikopterin në lumin Potomac, tha një zëdhënës i byrosë për CNN.

Ekipi i Kërkimit Nënujor i FBI përbëhet nga agjentë të trajnuar posaçërisht të stacionuar në të gjithë vendin.