Inspektorati Policor i Kosovës ka nisur hetimet preliminare, në lidhje me dy raste ku janë përfshirë zyrtarët e Policisë së Kosovës, si të dyshuar për vepra penale, gjatë ushtrimit të detyrës zyrtare.
Katër zyrtarë policorë u suspenduan, dy në Pejë e dy në Gjilan – dhe të njëjtit do të jenë objekt hetimi për incidentet në të cilat dyshohet se kanë gisht, raporton Klankosova.tv.
Rasti në Pejë
Në rastin e parë për të cilin IPK njoftoi, bëhet fjalë për një nënkolonel dhe një kapiten policor, të dyshuar për veprën penale “keqpërdorim i detyrës apo autoritetit zyrtar”.
Klankosova.tv ka mësuar se dy zyrtarët e suspenduar janë Prek Tuna dhe Nexhat Gutiq.
Incidenti dyshohet të ketë ndodhur më 28.05.2025 kur disa zyrtarë policorë në Pejë ishin njoftuar për një aksident trafiku në rrugën “Shpëtim Bojku” dhe gjatë këqyrjes së vendit të ngjarjes kanë shoqëruar në stacion policor edhe një të dyshuar i cili nuk ishte përfshirë fare në aksident por që ka penguar zyrtarët policorë në realizimin e detyrave të tyre.
Nënkoloneli dhe kapiteni policor dyshohet se kanë ndërhyrë në këtë rast (shoqërimin e të dyshuarit në stacion) duke mos përcjellë rastin për hetim dhe nuk është njoftuar Prokuroria për rast (në kundërshtim me procedurat standarde të veprimit të policisë në raste të tilla), duke i shqiptuar të dyshuarit një tiketë për kundërvajtje për prishje të rendit dhe qetësisë publike.
Rasti në Gjilan
Nderkaq, në Gjilan u suspenduan një rreshter dhe një tjetër zyrtar policor, nën dyshimin se keqtrajtuan një qytetar derisa i njëjti ishte në stacionin e policisë.
Sipas IPK-së, rasti ka ndodhur më 18 qershor 2025 në orët e mbrëmjes në qendër të Gjilanit pas raportimit të një incidenti paraprak dhe pas shoqërimit në polici të një qytetari i cili pretendon për tejkalim të autorizimeve policore dhe keqtrajtim nga dy zyrtarë policorë.
“Rasti është regjistruar në IPK dhe hetuesit janë angazhuar duke ndërmarrë veprime konkrete hetimore përfshirë shikimin e video-incizimeve të kamerave të sigurisë, identifikimin e dëshmitarëve të mundshëm”, thuhet në njoftim.
Më tej, shtohet se hetuesit e IPK-së në konsultim të vazhdueshëm me prokurorin përgjegjës pritet të ndërmarrin edhe veprime të tjera hetimore lidhur me këtë rast për të sqaruar rrethanat e këtij incidenti.
Vërejtje: Personi i përmendur në këtë artikull, sipas ligjeve të Republikës së Kosovës, konsiderohet i pafajshëm deri në vendimin e formës së prerë nga gjykata
The post Katër eprorë të Policisë së Kosovës të suspenduar veç sot, dyshime për shkelje të rënda gjatë detyrës appeared first on Kosovapost.net.
